គណៈកម្មការសហភាពអាហ្វ្រិក សម្ព័ន្ធរដ្ឋអារ៉ាប់ និងអង្គការសហប្រតិបត្តិការឥស្លាម (OIC) កាលពីថ្ងៃពុធ បានថ្កោលទោសចំពោះ«ការអនុវត្តខុសច្បាប់» នៃការកាន់កាប់របស់អ៊ីស្រាអែលនៅក្នុងទឹកដីប៉ាឡេ ស្ទីន ដោយព្រមានថា សកម្មភាពបែបនេះគំរាមកំហែងដល់ទស្សនវិស័យសម្រាប់សន្តិភាពយូរអង្វែង និង បំផ្លាញច្បាប់អន្តរជាតិ។

នៅក្នុងសេចក្តីថ្លែងការណ៍រួមមួយដែលបានចេញផ្សាយកាលពីថ្ងៃពុធ ប្រធានអង្គការទាំងបី «បានថ្កោលទោសយ៉ាងដាច់អហង្ការចំពោះការបន្តនៃគម្រោងដាក់បញ្ចូល និងការតាំងទីលំនៅរបស់អ៊ីស្រាអែល នៅក្នុងទឹកដីប៉ាឡេស្ទីនដែលគ្រប់គ្រងដោយប្រទេសនេះ»។

ពួកគេបានសម្តែងការបដិសេធចំពោះអ្វីដែលពួកគេបានពិពណ៌នាថា ជា «វិធានការមិនត្រឹមត្រូវ» ដោយកត់សម្គាល់ថា គោលនយោបាយតាំងលំនៅឋានរបស់អ៊ីស្រាអែល «គឺជាការរំលោភបំពានយ៉ាងធ្ងន់ធ្ងរលើច្បាប់អន្តរជាតិ និងសេចក្តីសម្រេចពាក់ព័ន្ធរបស់អង្គការសហប្រជាជាតិ»។

ពួកគេបានថ្កោលទោសចំពោះ«ការរំលោភសិទ្ធិ និងសេរីភាពជាមូលដ្ឋានរបស់ប្រជាជនប៉ាឡេស្ទីនដោយ អ៊ីស្រាអែល រួមទាំងតាមរយៈប្រតិបត្តិការប្រព័ន្ធបែងចែកពូជសាសន៍ ដែលរើសអើងដោយផ្អែកលើពូជសាសន៍ និងសាសនា»៕