កងកម្លាំងអ៊ីស្រាអែលបានកំណត់គោលដៅ និងសម្លាប់កុមារប៉ាឡេស្ទីនដោយចេតនានៅក្នុងតំបន់ហ្កាហ្សា និងតំបន់វេសបែង។នេះបើយោងតាមការស៊ើបអង្កេតរបស់អង្គការសហប្រជាជាតិ ដែលនិយាយថា ការវាយប្រហារទាំងនេះ ស្មើនឹងឧក្រិដ្ឋកម្មសង្គ្រាម និងចង្អុលបង្ហាញពីចេតនាប្រល័យពូជសាសន៍។

លោក Srinivasan Muralidhar ប្រធានគណៈកម្មការស៊ើបអង្កេតអន្តរជាតិឯករាជ្យរបស់អង្គការសហប្រជាជាតិស្តីពីទឹកដីប៉ាឡេស្ទីន និងអ៊ីស្រាអែល បានបង្ហាញការរកឃើញនេះកាលពីថ្ងៃអង្គារ ខណៈពេលកំពុងពិភាក្សាអំពីរបាយការណ៍ថ្មីមួយស្តីពីការរំលោភបំពានរបស់អ៊ីស្រាអែលប្រឆាំងនឹងអនីតិជន។

លោកបាននិយាយថា គណៈកម្មការនេះ បានរកឃើញ «ភស្តុតាងដែលមិនអាចប្រកែកបាន» នៃការសម្លាប់កុមារប៉ាឡេស្ទីនដោយចេតនា ក៏ដូចជាការធ្វើទារុណកម្ម ការប្រព្រឹត្តដ៏អមនុស្សធម៌ និងបន្ទាបបន្ថោក អំពើហិង្សាផ្លូវភេទ និងយេនឌ័រ និងការវាយប្រហារលើហេដ្ឋារចនាសម្ព័ន្ធសំខាន់ៗសម្រាប់កុមារ ដូចជាមណ្ឌលកុមារកំព្រា ការថែទាំសុខភាព និងកន្លែងអប់រំ។

យោងតាមគណៈកម្មការ កងកម្លាំងអ៊ីស្រាអែលបានសម្លាប់កុមារប៉ាឡេស្ទីនជាង ២០.០០០ នាក់ និងធ្វើឲ្យរបួសជាង ៤៤.០០០ នាក់ផ្សេងទៀត នៅចន្លោះខែតុលា ឆ្នាំ ២០២៣ និងខែតុលា ឆ្នាំ ២០២៥។ ការរកឃើញរបស់អង្គការ UNICEF ក៏បានបង្ហាញផងដែរថា គិតត្រឹមខែកុម្ភៈ ឆ្នាំ ២០២៦ ចំនួនកុមារនៅតំបន់ហ្កាហ្សា បានកើនឡើងដល់ ២១.២៨៩ នាក់ ត្រូវបានសម្លាប់ និង ៤៤.៥០០ នាក់ រងរបួស៕