រដ្ឋមន្ត្រីការបរទេសអាមេរិក លោក Marco Rubio បានប្រាប់អ្នកយកព័ត៌មាននៅប្រទេសកូវ៉ែតថា រដ្ឋបាលទីក្រុងវ៉ាស៊ីនតោនចង់ឲ្យអាជ្ញាធរលីបង់គ្រប់គ្រងទឹកដីរបស់ពួកគេដោយឯករាជ្យ។

លោក Rubio បាននិយាយថា៖«នោះគឺជាក្តីសង្ឃឹមរបស់យើងថា កងកម្លាំងប្រដាប់អាវុធលីបង់ និងរដ្ឋាភិបាលលីបង់ដែលមានអធិបតេយ្យភាពស្របច្បាប់ នឹងបន្តអាចគ្រប់គ្រង និងធានាសុវត្ថិភាពទឹកដីរបស់ពួកគេកាន់តែច្រើនឡើងៗ ពីព្រោះនោះគឺជាអ្នកដែលត្រូវការគ្រប់គ្រងទឹកដីលីបង់ មិនមែនជាក្រុមភេរវ ករ ដូចជាក្រុមហេសបូឡាទេ» ដោយធ្វើអត្ថាធិប្បាយលើសេចក្តីថ្លែងការណ៍របស់រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz ដែលថា រដ្ឋជ្វីហ្វមិនមានបំណងដកកងទ័ពរបស់ខ្លួនចេញពីភាគខាងត្បូងប្រទេសលីបង់ទេ ទោះបីជាសហរដ្ឋអាមេរិកទាមទារក៏ដោយ។

«មូលហេតុដែលពួកគេពាក់ព័ន្ធនៅទីនោះ គឺដោយសារតែទឹកដីនៃប្រទេសលីបង់ កំពុងត្រូវបានប្រើប្រាស់ដើម្បីវាយប្រហារដោយយានដ្រូន និងមីស៊ីលប្រឆាំងនឹងអ៊ីស្រាអែល ប៉ុន្តែកងកម្លាំងប្រដាប់អាវុធលីបង់អាចធានាបានកាន់តែច្រើន ការគ្រប់គ្រងរបស់ក្រុមហេសបូឡាកាន់តែតិច និងអ៊ីស្រាអែលនឹងគ្រប់គ្រងកាន់តែតិចនៅក្នុងប្រទេសលីបង់។ ប៉ុន្តែជាក់ស្តែង នោះគឺជាដំណើរការដែលយើងកំពុងធ្វើការឥឡូវនេះជាមួយនឹងការចរចាទាំងនេះ។

លោក Rubio បាននិយាយថា៖«ខ្ញុំគិតថា នោះជាចំណុចសំខាន់នៃកិច្ចចរចាទាំងនេះ» ដោយសំដៅទៅលើការចរចារវាងអ៊ីស្រាអែល និងលីបង់នៅទីក្រុងវ៉ាស៊ីនតោន «ហើយនោះគឺជាអ្វីដែលពួកគេកំពុងនិយាយជាមួយលីបង់អំពីការសម្របសម្រួលរបស់យើង»៕