សារព័ត៌មានរដ្ឋរាយការណ៍នៅថ្ងៃព្រហស្បតិ៍នេះថា ក្រុមនិស្សិតកូរ៉េខាងជើង បានប្រារព្ធខួបលើកទី ៧៦នៃសង្រ្គាមកូរ៉េកាលពីថ្ងៃពុធម្សិលមិញ ដោយពួកគេនាំគ្នាកាន់រូបភាព និងបដាមានពាក្យស្លោកប្រឆាំងសហរដ្ឋអាមេរិក ។

រូបភាពវីដេអូឃ្លីបផ្តល់ជូនដោយទីភ្នាក់ងារព័ត៌មានផ្លូវការកូរ៉េខាងជើង KCNA ដែលទីភ្នាក់ងារព័ត៌មានរ៉យទ័រមិនអាចបញ្ជាក់ផ្ទៀងផ្ទាត់ដោយឯករាជ្យបាន ឃើញក្រុមនិស្សិត បានជួបជុំគ្នា និងស្រែកនៅមហោស្រពកណ្តាលវាល Youth Park ស្ថិតក្នុងទីក្រុងព្យុងយ៉ាង ដោយមានកាន់រូបថត និងបដាមានពាក្យស្លោកដូចជាពាក្យ “ចូរពួកយើងសងសឹករាប់ពាន់ដងលើឃាតករចក្រពត្តិនិយមអាមេរិក” ។

គួររំឭកថា សង្រ្គាមកូរ៉េ បានចាប់ផ្តើមឡើងកាលពីថ្ងៃទី ២៥ ខែមិថុនា ឆ្នាំ ១៩៥០ ពេលដែលទាហានកុម្មុយនិស្តកូរ៉េខាងជើង បើកការវាយប្រហារដ៏គួរឲ្យភ្ញាក់ផ្អើលលើបន្ទាត់ស្របទី ៣៨ ចូលទៅក្នុងកូរ៉េខាងត្បូង ។

កងកម្លាំងអង្គការសហប្រជាជាតិដឹកនាំសហរដ្ឋអាមេរិក បានធ្វើសង្រ្គាមជាមួយកូរ៉េខាងជើងដែលគាំទ្រដោយចិន និងសហភាពសូរៀត នៅក្នុងសង្រ្គាមដែលបានសម្លាប់ទាហាន និងជនស៊ីវិល ៣លាននាក់ និងបន្សល់ទុកជនភៀសខ្លួន ៥លាននាក់ ។

តាមន័យបច្ចេកទេស កូរ៉េខាងជើង និងកូរ៉េខាងត្បូង មានសង្រ្គាមនឹងគ្នានៅឡើយ ចាប់តាំងពីជម្លោះបានបញ្ចប់ទៅត្រឹមបទឈប់បាញ់នៅថ្ងៃទី ២៧ ខែកក្កដា ឆ្នាំ ១៩៥៣ ដោយគ្មានសន្ធិសញ្ញាសន្តិភាពនោះទេ ៕