ប្រធានាធិបតីអាមេរិក លោក Donald Trump បានចាប់​ផ្ដើម​បើក​ពិធីអបអររយៈពេល ១៦ថ្ងៃ សម្រាប់ខួបលើកទី២៥០​ របស់សហរដ្ឋា​អាមេរិក កាលពី​ថ្ងៃពុធ (ទី២៤ ខែមិថុនា ឆ្នាំ២០២៦) ដោយ​ការ​ថ្លែង​សុន្ទរកថាតាម​បែបជួបជុំនយោបាយ​ ដែលជា​ការ​ប្រែក្លាយព្រឹត្ដិការណ៍​ដ៏ពិសេស​​របស់​ជាតិទៅជាការបង្ហាញនយោបាយខ្លាំងៗ សម្រាប់របៀបវារៈអាណត្តិទី២ របស់លោក។

សុន្ទរកថា នៅទីលាន​ National Mall ក្នុងទីក្រុងវ៉ាស៊ីនតោន បានគូសបញ្ជាក់ពីរបៀបដែលលោក Trump បានផ្លាស់ប្ដូរ​ទម្រង់​នៃ​ពិធី​រំលឹក​ខួបនេះ ទៅជា​វិធីសាស្ត្រា​នយោបាយ និងសមត្ថភាព​សម្តែងផ្ទាល់ខ្លួនរបស់លោក ដោយធ្វើឲ្យ​មិន​មាន​ភាព​ច្បាស់​លាស់​ រវាងការប្រារព្ធពិធីផ្លូវការ និងទស្សនីយភាព​តាម​បែបការធ្វើ​យុទ្ធនាការ។ មេដឹកនាំទៅ​ពី​គណបក្ស​សាធារណរដ្ឋរូបនេះ នៅទីបំផុត បានរំលឹកពីប្រវត្តិសាស្ត្រដ៏អស្ចារ្យរបស់​សហរដ្ឋ​ ប៉ុន្តែផ្នែកដំបូងនៃសុន្ទរកថារបស់លោក ភាគច្រើនមិនអាចបែងចែកឲ្យ​ដាច់​ពីការជួបជុំនយោបាយរបស់លោក ទោះបីជាបាននិយាយ​ក្នុងសម្លេងមិន​សូវ​ខ្លាំង​ក្លា​ក៏ដោយ។

ដោយបាន​កែសម្រួលសំឡេងស្រែកដែល​គ្រប់គ្នា​ធ្លាប់​បាន​ដឹង អំឡុង​ពេល​លោក​មាន​ការ​ជួបជុំនយោបាយ​លោក Trump បានលើក​ឡើង​ថា៖ «ខណៈពេលដែលយើងជិត​រៀបចំ​​ព្រឹត្តិការណ៍​រំលឹក​ខួប​ឯករាជ្យលើកទី២៥០​ របស់យើង ខ្ញុំមាន​ក្ដី​រំភើបណាស់ដែលត្រូវ​ប្រកាសថា អាមេរិកបានវិលត្រឡប់មកវិញហើយ។ ហើយដូចដែលអ្នកដឹងច្បាស់ណាស់ កាលពីពេលថ្មីៗនេះ យើងជាប្រទេសបរាជ័យ​។ យើងបានរង​បរាជ័យ​។ ឥឡូវនេះយើងជាប្រទេសដែលជោគជ័យ​ និង​មាន​ឥទ្ធិពល​បំផុត នៅលើពិភពលោក»។

លោក Trump បានចាប់ផ្តើមជាមួយតំបន់​មជ្ឈិមបូព៌ា ដោយបានកំណត់សង្គ្រាមអាមេរិក-អ៊ីស្រាអែលជាមួយអ៊ីរ៉ង់ថា ជាជ័យជម្នះដ៏ធំ សម្រាប់ជនជាតិអាមេរិក ហើយបានហៅការចាប់ខ្លួនមេដឹកនាំវ៉េណេស៊ុយអេឡា លោក Nicolas Maduro របស់សហរដ្ឋអាមេរិកថា ជា «ការវាយឆ្មក់យោធាដ៏អស្ចារ្យមួយ ក្នុងប្រវត្តិសាស្ត្រ»។ នៅ​ក្នុង​ស្រុកវិញ លោកបាននិយាយ​ដោយ​មោទនភាពនូវ​អ្វីដែលលោកពិពណ៌នាថា ជាសេដ្ឋកិច្ច​រីកចម្រើន ដោយ​បានវាយប្រហារកំណត់ត្រារបស់អ្នកកាន់តំណែងមុន គឺ​លោក Joe Biden ថា ជា «គ្រោះមហន្តរាយទាំងស្រុង» និងបានអះអាង​ពី​ប្រាក់វិនិយោគក្នុង​ប្រទេស​ ១សែន​កោដិ​ដុល្លារ ជា​តួលេខនេះខ្ពស់ជាងការអះអាងដោយ​រដ្ឋបាលរបស់លោកផ្ទាល់៕