ប្រធានាធិបតីអាមេរិក លោក Donald Trump បានបង្ហាញ​ភាព​មិន​សូវ​ចាប់អារម្មណ៍​ ចំពោះ​លោក Andy Burnham ដែលទំនង​ក្លាយជានាយករដ្ឋមន្ត្រីអង់គ្លេសបន្ទាប់ ដោយលោក​បាន​និយាយ​ថា លោកមិនសូវស្គាល់អ្នក​នយោបាយ​រូបនេះ​ទេ ហើយគ្រាន់តែឮថា លោក «មានគំនិតសេរីនិយមខ្លាំងណាស់​»។

កាល​ពី​ថ្ងៃពុធ (ទី២៤ ខែមិថុនា ឆ្នាំ២០២៦) មេដឹកនាំអាមេរិករូបនេះត្រូវបានអ្នក​សារ​ព័ត៌មានមួយ​រូប​សួរ អំពីអ្វីដែលលោកដឹងអំពីលោក Burnham អតីតអភិបាលក្រុង Greater Manchester ដែលត្រៀមជំនួសលោក Keir Starmer ក្នុងការផ្លាស់ប្តូរថ្នាក់ដឹកនាំចុងក្រោយរបស់ចក្រភពអង់គ្លេស។

ក្នុងអំឡុងពេលមាន​ជំនួប នៅឯ​សេតវិមាន ជាមួយអគ្គលេខាធិការអង្គការណាតូ (NATO) លោក Mark Rutte លោក Trump បាននិយាយថា៖ «ខ្ញុំមិនដឹងអ្វីទាំងអស់។ ខ្ញុំ​ដឹង​ថា គាត់ (លោក Burnham) ធ្លាប់ជាអភិបាលក្រុង​។ ខ្ញុំឮថា គាត់មានគំនិតសេរីនិយមខ្លាំង គឺ​ខ្លាំងណាស់​ ដូច្នេះ មានន័យថា គាត់ប្រហែលជាមិនបើកចំហសមុទ្រខាងជើងទេ»។

គួរបញ្ជាក់​ថា លោក Burnham ទំនងជាបេក្ខជនតែម្នាក់គត់ដែលត្រូវបានតែងតាំង ដើម្បីជំនួសលោក Starmer ជាមេដឹកនាំគណបក្សការងារ​ ហើយអាចក្លាយជានាយករដ្ឋមន្ត្រី នៅពាក់កណ្តាលខែកក្កដា។ ហើយ​ការអត្ថាធិប្បាយរបស់មេដឹកនាំ​អាមេរិក បានបង្កើត​ស្ថាន​ភាព​ដែលអាចនឹងមាន​ភាព​រង្គោះរង្គើ ក្នុង​ទំនាក់ទំនង រវាងអ្នក​នយោបាយ​ទាំង២៕