កាលពី​ថ្ងៃពុធ (ទី២៤ ខែមិថុនា ឆ្នាំ២០២៦) មេដឹកនាំអឺរ៉ុបបានបញ្ជាក់ជាថ្មីពី​ការប្តេជ្ញាចិត្ត ចំពោះភាពជាដៃគូការពារជាតិដ៏រឹងមាំ មុនកិច្ចប្រជុំកំពូលរបស់​អង្គការ​ណាតូ (NATO) នាខែក្រោយ នៅទីក្រុង Ankara ប្រទេស​ទួរគី បន្ទាប់ពីមាន​ជម្លោះជាបន្តបន្ទាប់ជាមួយប្រធានាធិបតីអាមេរិក លោក Donald Trump និងភាពតានតឹង ក្នុងចំណោមសមាជិកអឺរ៉ុបសំខាន់ៗ។

ជាមួយ​គ្នា​នោះ មេដឹកនាំ​ទាំង​អស់​ក៏បានផ្តល់ការលាគ្នាយ៉ាងកក់ក្តៅផង​ដែរ​ដល់នាយករដ្ឋមន្ត្រីអង់គ្លេសដែលជិតផុតអាណត្តិ លោក Keir Starmer បន្ទាប់ពីលោកបានប្រកាសនៅសប្តាហ៍នេះថា លោកនឹងចុះចេញពីតំណែង ក្នុងពេលមានការមិនពេញចិត្តកាន់តែខ្លាំងឡើង នៅក្នុងគណបក្សរបស់លោក។

អធិការបតីអាល្លឺម៉ង់ លោក Friedrich Merz ដែលបានអញ្ជើញមេដឹកនាំនៃចក្រភពអង់គ្លេស បារាំង អ៊ីតាលី និងប៉ូឡូញទៅកាន់ទីក្រុងប៊ែរឡាំង បាននិយាយថា កិច្ចប្រជុំកំពូលអង្គការ​ណាតូ នៅថ្ងៃទី ៧-៨ ខែកក្កដា នឹងជាពេលវេលា ដើម្បីបង្ហាញពីការប្តេជ្ញាចិត្តរបស់អឺរ៉ុប ក្នុងការដើរតួនាទីភាព​ជា​ដឹកនាំកាន់តែរឹងមាំក្នុងវិស័យការពារជាតិ។

សេចក្តីថ្លែងការណ៍រួមមួយ «បានបញ្ជាក់ពីការប្តេជ្ញាចិត្តឥត​ងាករេរបស់ថ្នាក់ដឹកនាំ​ទាំងអស់ ចំពោះសន្តិសុខអឺរ៉ុប-អាត្លង់ទិក និងចំណងទាក់​ទង​ឆ្លង​មហាសមុទ្រ​អាត្លង់ទិក»។ នៅពីក្រោយសារនៃសាមគ្គីភាព ការអញ្ជើញរបស់លោក Merz ទៅកាន់ទីក្រុងប៊ែរឡាំង បានកើតឡើងបន្ទាប់ពីឧប្បត្តិហេតុជាច្រើនដែលបានបង្ហាញពីភាពតានតឹង លើបញ្ហាការពារជាតិ និងសន្តិសុខ ក្នុងចំណោមដៃគូសំខាន់ៗរបស់អឺរ៉ុប។

គួរបញ្ជាក់​ថា ក្នុងរយៈពេលប៉ុន្មានខែថ្មីៗនេះ ទីក្រុងវ៉ាស៊ីនតោនបានរិះគន់សម្ព័ន្ធភាពយោធាមួយនេះ ចំពោះភាព​ស្ទាក់ស្ទើររបស់ខ្លួន ក្នុងការគាំទ្រសង្គ្រាមអាមេរិក-អ៊ីស្រាអែល លើអ៊ីរ៉ង់ និងបានគំរាមកំហែងដកទ័ព នៅតំបន់​អឺរ៉ុប​៕