ប្រធានាធិបតីស្តីទី លោកស្រី​ Delcy Rodriguez បាន​ឲ្យ​ដឹង​នៅ​ថ្ងៃព្រហស្បតិ៍ (ទី២៥ ខែមិថុនា ឆ្នាំ២០២៦) នេះ​ថា ចំនួន​អ្នក​ស្លាប់​បាន​កើន​ឡើងដល់​យ៉ាង​ហោចណាស់​​ ១៦៤នាក់ហើយ​ ខណៈ​យ៉ាង​តិច​ ៩៧១នាក់បាន​រងរបួស ក្នុង​ហេតុការណ៍​រញ្ជួយដីដ៏ខ្លាំងក្លាចំនួន ២ ដែល​បាន​កើតមាន​នៅ​ប្រទេសវ៉េណេស៊ុយអេឡា។

លោកស្រី​ប្រធានាធិបតីស្ដិទី​រូប​នេះ បាននិយាយនៅ​មុននេះថា មនុស្ស ៣២នាក់បានបាត់បង់ជីវិត ហើយ​ជាង ៧០០នាក់​បាន​រង​របួស បន្ទាប់ពីមាន​​គ្រោះរញ្ជួយដីកម្រិត ៧,២ និង ៧,៥រ៉ិចទ័រ កាលពីល្ងាចថ្ងៃពុធ តែ​បាន​ព្រមានថា ​ចំនួនអ្នកស្លាប់ត្រូវបានគេរំពឹងថា នឹងកើនឡើង។

គ្រោះរញ្ជួយដីទាំងនេះ គឺជាគ្រោះរញ្ជួយដីដ៏ខ្លាំងក្លាបំផុតលើក​ដំបូង​ ដែលបានវាយប្រហារប្រទេសវ៉េណេស៊ុយអេឡា ក្នុងរយៈពេលជាង ១សតវត្សរ៍។ មនុស្សបាន​រត់ចេញពី​អគារ ដែល​នៅ​ឆ្ងាយរហូតដល់​​ព្រៃអាម៉ាហ្សូនរបស់ប្រេស៊ីល ដោយ​មាន​ចម្ងាយប្រហែល ១.៧០០គីឡូម៉ែត្រ ពីរដ្ឋធានីការ៉ាកាសរបស់វ៉េណេស៊ុយអេឡា។

ខណៈប្រតិបត្តិការ​ជួយសង្គ្រោះ​កំពុង​បន្ត​ រូប​ភាព​វីដេអូតាម​កញ្ចក់​ទូរទស្សន៍រដ្ឋ បានបង្ហាញឲ្យ​ឃើញ​កុមារនៅមាន​ជីវិត ៣នាក់ ​ ត្រូវបានទាញចេញពីគំនរបាក់បែក នៅក្នុងរដ្ឋ La Guaira ដែលលោក​ស្រី​ Rodriguez បានពិពណ៌នាថា ជា តំបន់ «មហន្តរាយ« និងជាតំបន់ដែលរងផលប៉ះពាល់ខ្លាំងបំផុតដោយរញ្ជួយនេះ​។

លោកស្រី Rodriguez បានប្រកាសគ្រា​អាសន្ន នៅក្នុងសុន្ទរកថាមួយទៅកាន់ប្រជាជាតិ កាលពី​យប់ថ្ងៃពុធ ដោយលើក​ឡើង​ថា រញ្ជួយដីទាំងនេះបានបង្កឲ្យមាន​ការខូចខាតនៅក្នុងរដ្ឋជាច្រើន។ លោកស្រីបានស្នើសុំឲ្យ​អ្នកជំនាញថែទាំសុខភាពរាយការណ៍ទៅកាន់មន្ទីរពេទ្យនានា ដើម្បីផ្ដល់​ជំនួយ​ដល់​អ្នករងរបួស៕