រញ្ជួយដីដ៏ខ្លាំងក្លាមួយ បានកើត​មាន​នៅឆ្នេរសមុទ្រភាគខាងជើងរបស់ជប៉ុន នៅ​ថ្ងៃព្រហស្បតិ៍ (ទី២៥ ខែមិថុនា ឆ្នាំ២០២៦) នេះ ប៉ុន្តែទីភ្នាក់ងារឧតុនិយមរបស់ប្រទេសនេះ បានបញ្ជាក់​ថា គ្មាន​ហានិភ័យ​ពីការ​មាន​រលកយក្សស៊ូណាមិឡើយ​។

ទីភ្នាក់ងារឧតុនិយមរបស់​ជប៉ុននេះ បានឲ្យ​ដឹង​ថា រញ្ជួយដីនេះមានកម្រិត ៧,២រ៉ិចទ័រ ហើយបានកើតឡើងនៅឆ្នេរសមុទ្រភាគខាងកើតនៃខេត្ត​ Iwate ជាការ​ដំឡើង​ពី​កម្រិត​ដំបូង ៦,៩រ៉ិក​ទ័រ។ ទីភ្នាក់ងារនេះបានបន្ថែម​ថា ការ​រញ្ជួយនេះមានជម្រៅប្រហែល ៥០គីឡូម៉ែត្រ។ ទីភ្នាក់ងារស្ទាប​ស្ទង់ភូគព្ភសាស្ត្ររបស់សហរដ្ឋអាមេរិក (USGS) ក៏បានរាយការណ៍ផង​ដែរ​ពីកម្រិត ៦,៩រ៉ិចទ័រ។

ការរញ្ជួយនេះបានកើតឡើងនៅក្នុងតំបន់មួយដែលមានការរាយការណ៍ម្តងហើយម្តងទៀត អំពីគ្រោះ​រញ្ជួយដីខ្លាំងៗ ក្នុងរយៈពេលប៉ុន្មានខែថ្មីៗនេះ ក្នុង​នោះ​រួមទាំងការរញ្ជួយដែលបានបង្កឲ្យ​មានការព្រមានអំពីការរញ្ជួយដីដ៏ធំរយៈពេលមួយសប្តាហ៍ កាល​ពី​ខែធ្នូឆ្នាំមុន​ផងដែរ​។

រញ្ជួយដីដែលបានវាយប្រហារតំបន់ភាគឦសានរបស់ជប៉ុន ក្នុងអំឡុងពេលម៉ោងមមាញឹក នាព្រឹកថ្ងៃព្រហស្បតិ៍នេះ​ ក៏បានអង្រួន​ទីក្រុងតូក្យូបន្តិចបន្តួចផងដែរ។ អ្នកនាំពាក្យរដ្ឋាភិបាលជាន់ខ្ពស់​ លោក​ Minoru Kihara បាន​ឲ្យ​ដឹង​ថា មិនមានរបាយការណ៍ភ្លាមៗឡើយ​ អំពីអ្នករងរបួស ឬការខូចខាត៕