នាយកដ្ឋានបរិស្ថាន និងឧតុនិយមរបស់ប្រទេសថៃ បានរាយការណ៍ថា សន្ទស្សន៍កម្ដៅទីក្រុងបាងកក បានឡើងដល់កម្រិត «គ្រោះថ្នាក់» ដោយឡើងខ្ពស់បំផុត ៥១,៩អង្សាសេ។
អាជ្ញាធរបានព្រមានប្រជាជន អំពីសីតុណ្ហភាពក្ដៅខ្លាំងដែលរាងកាយ «មានអារម្មណ៍ទទួលបាន» និងហានិភ័យ ពាក់ព័ន្ធនឹងសុរិយរោគ ដោយណែនាំសាធារណជនឲ្យកាត់បន្ថយសកម្មភាពនៅក្រៅផ្ទះ រវាងម៉ោង ១១ព្រឹក និង ៣រសៀល (តាមពេលវេលាម៉ោងក្នុងស្រុក)។
ជាមួយគ្នានេះ រដ្ឋាភិបាលក៏បានកំណត់ផងដែរនូវអត្តសញ្ញាណក្រុមងាយរងគ្រោះចំនួន ៨ ដែលតម្រូវឲ្យមានការត្រួតពិនិត្យជាបន្ទាន់ និងបានបើកដំណើរការ «បន្ទប់គេចពីកម្ដៅទីក្រុងបាងកក» នៅទូទាំងទីក្រុង។
ក្រសួងបានពន្យល់ថា សន្ទស្សន៍កម្ដៅ តំណាងឲ្យសីតុណ្ហភាពដែលរាងកាយ «មានអារម្មណ៍ទទួលបាន» មិនមែនសីតុណ្ហភាពទូទៅទេ។ តួលេខនេះត្រូវបានគណនាដោយការរួមបញ្ចូលសីតុណ្ហភាពខ្យល់ ជាមួយនឹងសំណើមដែលទាក់ទង។
សំណើមខ្ពស់ កាត់បន្ថយសមត្ថភាពបញ្ចេញញើសរបស់រាងកាយ ដែលនាំឲ្យមានកម្ដៅក្នុងខ្លួនកាន់តែខ្លាំង និងហានិភ័យទាក់ទងនឹងសុរិយរោគ។ របាយការណ៍អាកាសធាតុដែលត្រូវបានធ្វើបច្ចុប្បន្នភាព សម្រាប់ថ្ងៃទី២៥ ខែមិថុនា បានបង្ហាញថា ទីក្រុងបាងកកបានចូលទៅក្នុងតំបន់ក្រហមហើយ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
