យោងតាមទិន្នន័យដែលចេញផ្សាយនៅថ្ងៃព្រហស្បតិ៍ (ទី២៥ ខែមិថុនា ឆ្នាំ២០២៦) នេះ ដោយប្រព័ន្ធឃ្លាំមើលមរណភាពសាធារណៈរបស់ប្រទេស បាន​បង្ហាញ​ថា អេស្ប៉ាញបានកត់ត្រាការស្លាប់ចំនួន ២១២ករណី ទាក់ទងនឹងកម្ដៅ​ ចន្លោះ​ថ្ងៃទី២១ និងទី២៤ ខែមិថុនា។

ប្រព័ន្ធត្រួតពិនិត្យ ឬ MoMo បានរាយការណ៍ពីការស្លាប់ ចាប់តាំងពីថ្ងៃសៅរ៍ចុងសប្ដាហ៍កន្លង​មក​ នៅពេលដែលរលកកម្ដៅ​ បានចាប់ផ្តើមកើតមាន​ នៅទូទាំងប្រទេសអេស្ប៉ាញ។ ទិន្នន័យបានបង្ហាញពីការកើនឡើងជាលំដាប់នៃការស្លាប់ប្រចាំថ្ងៃ។ MoMo បានកត់ត្រាការស្លាប់ ១៣នាក់ នៅថ្ងៃសៅរ៍ ៣៨នាក់ នៅថ្ងៃអាទិត្យ ៦៦នាក់ នៅថ្ងៃចន្ទ និង ៩៥​នាក់ នៅថ្ងៃអង្គារ។

រលកកម្ដៅ​ក៏បានបំបែកកំណត់ត្រាសីតុណ្ហភាពជាច្រើនផងដែរ ក្នុង​នោះ​រួមទាំងសីតុណ្ហភាពក្ដៅ​បំផុតមិនធ្លាប់មាន នៅក្នុងភាគខាងជើងនៃតំបន់​ Cantabria គឺ ៤៣,៧អង្សាសេ។ សីតុណ្ហភាពក្ដៅ​បំផុតមិនធ្លាប់មានក៏ត្រូវបានកត់ត្រានៅទីក្រុង Zamora និងខេត្ត Almeria ផងដែរ។

ទីភ្នាក់​ងារ​អាកាសធាតុជាតិរបស់ប្រទេសអេស្ប៉ាញ Aemet មិន​បានចេញការព្រមាន​ពណ៌ក្រហម អំពីកម្ដៅ សម្រាប់ថ្ងៃព្រហស្បតិ៍នេះ​ទេ​។ សីតុណ្ហភាពនៅតែត្រូវបានគេរំពឹងថា នឹងឡើងដល់ប្រហែល ៣៧-៣៨អង្សាសេ នៅក្នុងតំបន់មួយចំនួន ខណៈដែលតំបន់ខ្លះត្រូវបានគេព្យាករថា នឹងមានភ្លៀងធ្លាក់ និងផ្គររន្ទះ៕