ភ្នំពេញ៖ កម្មករ-កម្មការិនីកាត់ដេរ ក្នុងរាជធានីភ្នំពេញ លើកឡើងថា ពួកគាត់បន្តប្រើប្រាស់ម៉ាសជាប្រចាំ ដើម្បីការពារជំងឺកូវីដ១៩ ខណៈតាមរោងចក្រពន្លឿនចាក់ដូសជំរុញ។

ស្របពេល ប្រជាពលរដ្ឋនៅទូទាំងប្រទេសបានចាប់អនុវត្តលែងប្រើប្រាស់ម៉ាស​នៅ​តាម​ទីសាធារណៈ ប៉ុន្តែលើកលែងកន្លែងបិទជិតឲ្យបន្តការប្រើប្រាស់ម៉ាសនោះ ថ្ងៃនេះ ខ្ញុំសូមបង្ហាញ​ជូនទស្សនិកជន​ ក្នុងរោងចក្រមួយក្នុងចំណោមរោងចក្រ សហគ្រាស ក្នុងរាជធានីភ្នំពេញ ដែល​ទទួលបានការយល់ដឹងច្រើនអំពីស្ថានភាពជំងឺកូវីដ១៩ បន្តនាំគ្នាអនុវត្តវិធានការការពារ​ក្នុង​កន្លែងធ្វើការ​របស់ខ្លួនដូចសព្វមួយដង។

កម្មករ-កម្មការិនី បានបង្ហាញការគាំទ្រចំពោះការដកកាតព្វកិច្ច ក្នុងនោះពួកគាត់លើកឡើងថា ទោះនៅតាម​សាធារណៈបានដកកាត្វកិច្ចប្រើប្រាស់ម៉ាស ហើយលើកទឹកចិត្តពាក់ម៉ាស​ក្នុងទៅ​កន្លែងបិទជិត កម្មករ-កម្មការិនី តាមរយៈការចុះមកដល់ទីតាំងរោងចក្រ វ៉ាន់ ហឺដា នៅតែនាំគ្នាប្រើប្រាស់​ម៉ាសជាប់ជាប្រចាំ។

ក្នុងកិច្ចសម្ភាសន៍ជាមួយ BTV News នៅថ្ងៃនេះ កម្មករ-កម្មការិនី លើកឡើងថា ទោះបីមានការ​ដកកាតព្វកិច្ច ឬពុំកំណត់បែបណា ក៏ពួកគាត់ប្រកាន់ខ្ជាប់ការការពារដោយការពាក់ម៉ាស​ក្នុង​កន្លែងធ្វើការ ខណះបណ្តាប្រទេសលើសកលលោកនៅតែរកឃើញការឆ្លងជំងឺកូវីដ១៩។

ទោះបីកាតព្វកិច្ចលែងពាក់ម៉ាសតាមទីសាធារណៈត្រូវបានបញ្ចប់កិពិតមែន​ ប៉ុន្តែសម្តេចតេជោ ហ៊ុន សែន នាយករដ្ឋមន្រ្តី នៅតែអំពាវនាវយ៉ាង​ទទូចដល់ប្រជាពលរដ្ឋសូមអញ្ជើញទៅទទួល​នូវករ​ចាក់វ៉ាក់សាំងដូសទី៣ ​ឬដូសជំរុញ ជាដូសទី៤ ដើម្បីឲ្យភាពសាំក្នុងសហគមន៍កាន់តែរឹងមាំបន្ថែម​ទៀត​ធានាដល់ការទប់ស្កាត់ការរីករាលដាលជំងឺកូវីដ១៩ នៅកម្ពុជាឲ្យបន្តទទួលបាន​ប្រសិទ្ធខ្ពស់​ផងដែរ។

គិតមកទល់ពេលនេះ កម្មករ កម្មការិនី ក្នុងវិស័យកាត់ដេរភាគច្រើនបានចាក់វ៉ាក់សាំងដូសជំរុញ ឬដូសទី៤ រួចរាល់ ខណះបច្ចុប្បន្ននេះក្រុមគ្រូពេទ្យកងទ័ពនៃកងយោធពលខេមរភូមិន្ទ កំពុង​បន្តបើក​យុទ្ធនាការចាក់វ៉ាក់សាំងជូនកម្មករ នៅតាមបណ្តារាជធានី-ខេត្ត រួមមាន​ រាជធានីភ្នំពេញ ខេត្តកណ្តាល កំពង់ស្ពឺ បាត់ដំបង និងបន្ទាយមានជ័យ៕ អត្ថបទ សេក ឧត្តម