ប្រធានាធិបតីកូរ៉េខាងត្បូង លោក Lee Jae Myung នៅ​ថ្ងៃព្រហស្បតិ៍ (ទី២៥ ខែមិថុនា ឆ្នាំ២០២៦) នេះ បានសន្យាយ៉ាង​ម៉ឺង​​ម៉ាត់​ថា នឹងកសាងឧបទ្វីបកូរ៉េដែលមាន​សន្តិភាព ជាទី​ដែល​មិនភ័យ​​ខ្លាចពី​ការ​ផ្ទុះ​​សង្គ្រាម និង​មិន​ត្រូវ​ការមាន​ជម្លោះ ខណៈដែលប្រទេសនេះបានប្រារព្ធខួបលើកទី៧៦​ នៃការផ្ទុះឡើងនូវ​សង្គ្រាមកូរ៉េឆ្នាំ១៩៥០-៥៣។

អំឡុង​ពេល​ថ្លែងនៅឯ​ពិធីដែលមានការចូលរួមពីអតីតយុទ្ធជនសម័យ​សង្គ្រាម មន្ត្រីរដ្ឋាភិបាល និងមេដឹកនាំយោធា លោក Lee បាននិយាយថា រដ្ឋបាលរបស់លោកនឹងការពារប្រទេសជាតិ តាមរយៈសមត្ថភាពការពារជាតិដ៏រឹងមាំ ខណៈពេលដែលកំពុងបន្តស្វែងរកសន្តិភាពយូរអង្វែង។​ នេះបើយោងតាមទីភ្នាក់ងារសារព័ត៌មាន Yonhap។

លោក Lee បានលើក​ឡើង​ថា៖ «(រដ្ឋាភិបាល) នឹងការពារប្រជាជន និងទឹកដីតាមរយៈសមត្ថភាពការពារជាតិដ៏រឹងមាំ និងកសាងឧបទ្វីបកូរ៉េដែលមាន​សន្តិភាព ជាទី​ដែល​​គ្មានការភ័យខ្លាចពីការ​មាន​សង្គ្រាម និង​មិន​ត្រូវការមាន​ជម្លោះ»។ លោក Lee បានបន្ថែម​ថា ការធានាសន្តិភាព នឹងជាផ្ដល់​ការគោរព​ដ៏អស្ចារ្យបំផុតដល់​អ្នកដែលបានពលី​ជីវិត និងយុវជនដែល​បាន​ការពារប្រទេស។

លោកក៏បានគោរពផង​ដែរ​ដល់អតីតយុទ្ធជនកូរ៉េខាងត្បូង និងអន្តរជាតិដែលបានប្រយុទ្ធក្នុងសង្គ្រាមនេះ​ ដោយលើក​ឡើង​ថា រដ្ឋាភិបាលនឹងបន្តគោរពដល់ការ​បម្រើ​របស់ពួកគេ និងការ​ការពារប្រទេសដែលពួកគេបានជួយកសាង​ឡើង​។

គួរបញ្ជាក់ថា សង្គ្រាមកូរ៉េបានចាប់ផ្តើមនៅថ្ងៃទី២៥ ខែមិថុនា ឆ្នាំ១៩៥០ ហើយបានបញ្ចប់ដោយបទឈប់បាញ់នៅឆ្នាំ១៩៥៣ ដែលធ្វើឲ្យឧបទ្វីបនេះនៅតែស្ថិតក្នុងសង្គ្រាមដដែល​។ ប្រទេសចំនួន ១៦ បានបញ្ជូនកងទ័ពទៅ​ប្រយុទ្ធ ក្រោមបញ្ជាការរបស់​អង្គការសហប្រជាជាតិ ដើម្បីគាំទ្រកូរ៉េខាងត្បូង អំឡុងជម្លោះនោះ​៕