ប្រធានាធិបតីអាមេរិក លោក Donald Trump បានប្រាប់ប្រធានអង្គាករណាតូ (NATO) លោក Mark Rutte កាលពីថ្ងៃពុធ (ទី២៤ ខែមិថុនា ឆ្នាំ២០២៦) ថា លោកត្រូវបានធ្វើ​ឲ្យ​ខកខិត្ត​ដោយ​សមាជិកនៃសម្ព័ន្ធមិត្តឆ្លងមហាសមុទ្រអាត្លង់ទិកមួយនេះ​ ​ ដែលមិនបានគាំទ្រសង្គ្រាមរបស់លោក ប្រឆាំងនឹងអ៊ីរ៉ង់។

ក្នុងអំឡុងពេលជួបជាមួយលោក Rutte នៅក្នុងការិយាល័យប្រធានា​ធិបតី Oval Office របស់​សេតវិមាន លោក Trump បានលើក​ឡើង​ថា៖ «យើងត្រូវបានធ្វើ​ឲ្យ​ខកចិត្ត។ យើងមិនត្រូវការជំនួយលើរឿងនេះទាល់តែសោះ។ យើងបានកម្ទេច (អ៊ីរ៉ង់) ទាំងស្រុង នៅក្នុងសប្តាហ៍ដំបូង ប៉ុន្តែវាគឺ​ជាការល្អ ប្រសិនបើពួកគេនិយាយថា ចង់ជួយយើង​»។

សម្រាប់​លោក Rutte វិញ លោក​បាននិយាយ​ការពារការបណ្ដាប្រទេសរបស់​អង្គការ​ណាតូ ដោយបញ្ជាក់​ថា មាន «យន្តហោះអាមេរិកចំនួន ៤.០០០-៥.០០០គ្រឿង បានហោះចេញពីមូលដ្ឋាននៅអឺរ៉ុប» អំឡុង​សង្គ្រាមនេះ​។

បន្ទាប់មក ប្រមុខអង្គការ​ណាតូរូបនេះ បានប្រាប់អ្នកសារព័ត៌មានបន្ទាប់ពីបញ្ចប់​កិច្ចប្រជុំថា លោក Trump «ប្តេជ្ញាចិត្តទាំងស្រុង ចំពោះសម្ព័ន្ធមិត្តណាតូ» ហើយបាននិយាយថា ទីក្រុងវ៉ាស៊ីនតោន នឹង «ការពារ» អឺរ៉ុប «ទាំងស្រុង» ក្នុងករណីមានការវាយប្រហារ។

គួរ​បញ្ជាក់ថា ការរិះគន់របស់លោក Trump ចំពោះអង្គការណាតូនេះ កើតឡើងត្រឹមតែ ២សប្តាហ៍ប៉ុណ្ណោះ មុនពេលមេដឹកនាំមកពីប្រទេសសមាជិកចំនួន ៣២ គ្រោងនឹងជួប​ជុំគ្នា សម្រាប់កិច្ចប្រជុំកំពូលនៅថ្ងៃទី ៧-៨ ខែកក្កដា នៅរដ្ឋធានីអង់ការ៉ារបស់​ប្រទេសទួរគី៕