នៅថ្ងៃព្រហស្បតិ៍ (ទី២៥ ខែមិថុនា ឆ្នាំ២០២៦) នេះ សភាដាណឺម៉ាកបានអនុម័តការដាក់ពង្រាយ ដើម្បី​ចូលរួមចំណែក​ ក្នុង​បេសកកម្មពហុជាតិសាសន៍ នៅច្រកសមុទ្រ Hormuz។ នេះយោងតាមប្រព័ន្ធផ្សព្វផ្សាយ​ DR។

សមាជិកសភាបានសម្រេចថា ប្រទេសដាណឺម៉ាកនឹងបញ្ជូនមន្ត្រី អ្នកបកប្រែ និងយានដ្រូន​ទៅកាន់តំបន់នេះ ដែលជាផ្នែកមួយនៃបេសកកម្មពហុជាតិសាសន៍ដឹកនាំដោយចក្រភពអង់គ្លេស និងបារាំង ជាក្រុម​ដែល​ត្រូវបាន​បង្កើតឡើង​ ក្នុង​គោលបំណងការពារសេរីភាពនៃការធ្វើនាវាចរណ៍ នៅក្នុងច្រកសមុទ្រ ក៏ដូចជាប្រតិបត្តិការកងទ័ពជើងទឹករបស់សហភាពអឺរ៉ុប (EU)។

ការចូលរួមចំណែក​នេះ មានមន្ត្រីបុគ្គលិក សមត្ថភាពយានដ្រូន​ និងអង្គភាពអ្នកបកប្រែសរុបប្រហែល ១០​នាក់។ សមត្ថភាពតាមអ៊ីនធឺណិត ក៏អាចត្រូវបានរួមបញ្ចូលនៅក្នុងកិច្ចប្រឹងប្រែងយោធារបស់ដាណឺម៉ាកផងដែរ។

ចាប់តាំងពីសហរដ្ឋអាមេរិក និងអ៊ីស្រាអែល បានចាប់ផ្តើមការវាយប្រហារតាមអាកាសលើអ៊ីរ៉ង់ កាល​ពី​ចុងខែកុម្ភៈ តំបន់នេះនៅតែមានភាពតានតឹង ដែលនាំឲ្យ​មានការសងសឹករបស់អ៊ីរ៉ង់ប្រឆាំងនឹងអ៊ីស្រាអែល និងប្រទេសក្នុងតំបន់ផ្សេងទៀតដែលមាន​ធនធានយោធា​​របស់សហរដ្ឋអាមេរិក។

អ៊ីរ៉ង់ និងសហរដ្ឋអាមេរិកបានឈានដល់អនុស្សរណៈ​នៃ​ការយោគយល់គ្នាចំនួន ១៤ចំណុច ដែលបានចូលជាធរមាននៅថ្ងៃទី១៨ ខែមិថុនា បន្ទាប់ពីត្រូវបានចុះហត្ថលេខាតាមប្រព័ន្ធ​អេឡិចត្រូនិកដោយប្រធានាធិបតីអ៊ីរ៉ង់ លោក​ Masoud Pezeshkian និងប្រធានាធិបតីអាមេរិក លោក​ Donald Trump។ ក្នុង​ចំណោម​លក្ខខណ្ឌផ្សេង​ៗ កិច្ចព្រម​ព្រៀងនេះ ក៏​តម្រូវ​ឲ្យមាន​ការ​បើក​ច្រកសមុទ្រ Hormuz ឡើង​វិញ​ដែរ​៕