សាលាក្រុង Los Cabos បានឲ្យ​ដឹង​នៅក្នុងសេចក្តីថ្លែងការណ៍មួយថា ការអបអរសាទរជ័យជម្នះនៃការប្រកួតបាល់​ទាត់​របស់ក្រុមម៉ិកស៊ិក ក្នុង​ព្រឹត្តិការណ៍ World Cup បានប្រែក្លាយទៅជាមាន​អំពើហិង្សា កាលពី​យប់ថ្ងៃពុធ (ទី២៤ ខែមិថុនា ឆ្នាំ២០២៦) បន្ទាប់ពីរថយន្ត ១គ្រឿង បានបុកចូល​ហ្វូងអ្នកគាំទ្រ នៅក្នុងទីក្រុង​រមណីយដ្ឋានទេសចរណ៍ដ៏ពេញនិយម Cabo San Lucas ដោយ​បាន​បណ្ដាល​ឲ្យ​មនុស្សជាង ១០​នាក់រងរបួស។

សេចក្តីថ្លែងការណ៍បានបន្ថែមថា មនុស្សសរុបចំនួន ១៧នាក់ បានទទួលការព្យាបាល ក្នុង​នោះ​រួមទាំងអ្នកបើកបរដែលត្រូវបានចាប់ខ្លួនផង​ដែរ​។

រូបភាពជាច្រើនបង្ហោះនៅលើបណ្ដាញ​សង្គម ដែលត្រូវបានផ្ទៀងផ្ទាត់ដោយសារព័ត៌មាន Reuters បង្ហាញពីរថយន្តពណ៌ខ្មៅ ១គ្រឿងហ៊ុព័ទ្ធដោយហ្វូងមនុស្សដែលពាក់អាវក្រុមបាល់ទាត់ជម្រើសជាតិម៉ិកស៊ិក។ បន្ទាប់មករថយន្តបានបង្កើនល្បឿនចូលទៅក្នុងហ្វូងមនុស្ស ដោយបាន​បុក​​មនុស្សប៉ើង​ទៅ​លើអាកាស មុនពេលទៅ​បុកនឹងបង្គោលភ្លើង។

វីដេអូផ្សេងទៀតដែលសារព័ត៌មាន​ Reuters បាន​ផ្ទៀងផ្ទាត់​ដែរ បង្ហាញពីហ្វូងមនុស្ស កំពុងទាញនរណាម្នាក់ចេញពីរថយន្ត ហើយវាយប្រហារពួកគេ ខណៈពេលដែលមនុស្សជាច្រើននាក់រង​របួស​ដេកនៅលើដីដោយមាន​ឈាមហូរ​។

លោក Jose Manuel Larumbe អភិបាលក្រុងស្តីទី Los Cabos បាននិយាយថា៖ «ខ្ញុំសុម​បង្ហាញពីសាមគ្គីភាពដ៏ជ្រាលជ្រៅបំផុតរបស់យើងជាមួយមនុស្សដែលរងគ្រោះ​ និងក្រុមគ្រួសាររបស់ពួកគេ បន្ទាប់ពីហេតុការណ៍ដ៏អកុសលបានកើតឡើងនៅយប់នេះ»។ លោក​បាន​សន្យា​ថា នឹង​ជូនដំណឹងដល់សាធារណជន អំពីការស៊ើបអង្កេតរបស់អាជ្ញាធរ ពាក់​ព័ន្ធ​នឹង​ករណី​នេះ​។

គួរបញ្ជាក់ថា ការប្រារព្ធ​ការ​អបអរនេះ​បានកើត​ឡើងនៅទូទាំងប្រទេសម៉ិកស៊ិក កាលពី​ល្ងាចថ្ងៃពុធ បន្ទាប់ពីក្រុម​ម៉ិកស៊ិកបានយកឈ្នះសាធារណរដ្ឋឆេក ៣-០ ក្នុងការប្រកួតចុងក្រោយរបស់ពួកគេនៃវគ្គចែកពូល ក្នុង​ព្រឹត្តិការណ៍ World Cup៕