រថយន្តដែលត្រូវបានគេលួច បោះចោល និងត្រូវបានបំផ្លិចបំផ្លាញ បន្តនៅរាយប៉ាយពាសពេញទីក្រុង Khartoum រយៈពេលជាង ១ឆ្នាំ ក្រោយកងទ័ពស៊ូដង់ ដណ្តើមបានមកវិញរដ្ឋធានីរបស់ប្រទេសស៊ូដង់មួយនេះ ពីកងកម្លាំងគាំទ្ររហ័ស(RSF) ។

លោក Fath Al-Rahman Muhammad Al-Toum គឺជាអ្នកនាំពាក្យនគរបាលក្រុង Khartoum និយាយថា ក្រុមអាជ្ញាធរ និយាយថា ពួកគេកំពុងដើរប្រមូលរថយន្តចេញពីផ្លូវ និងទីសាធារណៈនៅទូទាំងទីក្រុង ក្នុងនោះពាក្យបណ្តឹងពីការបាត់រថយន្តចំនួន ៩២.០០០គ្រឿង ត្រូវបានដាក់ ។

លោកបន្តថា រថយន្ត ៦៥០គ្រឿង ត្រូវបានរកឃើញពីប្រទេសស៊ូដង់ខាងត្បូង ហើយរថយន្តជាង ១០០គ្រឿង ត្រូវបានរកឃើញពីប្រទេសឆាដ ខណៈរថយន្តផ្សេងទៀត បានជាប់ដានទៅកាន់ប្រទេសនីហ៊្សេ និងប្រទេសប៊ូគីណា ហ្វាសូ ។

រូបភាពវីដេអូឃ្លីបឃើញជួរថយន្តដែលគេបោះចោល ត្រូវបានរឹបអូសដោយនគរបាល ហើយនិងដាក់នៅកន្លែងប្រមូលផ្តុំ ។

លោក Abdul-Moneim Bashir គឺជាប្រធានប្រតិបត្តិក្នុងតំបន់របស់ទីក្រុង Khartoum និយាយថា ស្របពេលដែលការយកចេញរថយន្តត្រូវការចំណាយប្រាក់ច្រើន និងជួបការលំបាកនោះ វាបានធ្វើឲ្យកាន់តែស្មុគស្មាញបន្ថែមទៀតផងដែរ ដល់កិច្ចខិតខំបោសសម្អាតទីក្រុងមួយនេះ ។

ប៉ុន្តែសម្រាប់ម្ចាស់រថយន្តមួយចំនួនដូចជារូបលោក Talaat Sayed និយាយថា កិច្ចខិតខំនេះ មានតម្លៃខ្លាំងណាស់ ។

លោក Sayed ដែលរថយន្ត ២គ្រឿងរបស់លោកត្រូវបានគេលួចអំឡុងជម្លោះនៅទីក្រុង Khartoum និយាយថា លោកសង្ឃឹមថា នឹងរកឃើញរថយន្តរបស់លោកមកវិញ ពីព្រោះថា វានឹងធ្វើឲ្យរូបលោកសន្សំប្រាក់បានច្រើន ។

ជាមួយនឹងកិច្ចខិតខំរបស់ក្រុមមន្រ្តី ក្រុមស្ម័គ្រចិត្ត បានជួយកំណត់អត្តសញ្ញាណម្ចាស់រថយន្ត តាមបណ្តាញព័ត៌មានសង្គម ។ លោក Ahmed Ali Doushi, គឺជាអ្នកស្ម័គ្រចិត្តមួយរូបនិយាយថា គំនិតផ្តួចផ្តើមនេះ បាននាំភាពសប្បាយរីករាយដល់ម្ចាស់រថយន្ត តាមរយៈការជួយពួកគេឲ្យរកឃើញរថយន្តដែលត្រូវបានគេលួចរបស់ពួកគេ ។

សូមបញ្ជាក់ថា សង្រ្គាមស៊ីវិលស៊ូដង់ ត្រូវគេមានជំនឿថា បានសម្លាប់មនុស្សរាប់ម៉ឺននាក់ និងមនុស្សរាប់លាននាក់ផ្សេងទៀត ជម្លៀសខ្លួន ចាប់តាំងពីវាផ្ទុះឡើងកាលពីខែមេសា ឆ្នាំ ២០២៣ ៕