ក្រសួងអប់រំ យុវជន និងកីឡា បានដឹកនាំសិស្សានុសិស្ស​ចំនួន​១៣​នាក់​ ទៅ​​ចូល​រួម​ការ​ប្រកួត​ក្នុង​កម្ម​វិធី The Young Master Challenge Global Final 2026 នៅ​សាកល​វិទ្យាល័យ Queen Mary នៃចក្រភពអង់គ្លេស ចាប់ពីថ្ងៃទី១៩មិថុនានេះ រហូត​ដល់​ថ្ងៃ​ទី​២៨​មិថុនា ហើយ​មក​ដល់​ពេល​នេះ កម្ពុជាទទួលបានមេដាយមាស ៣នាក់ មេដាយប្រាក់ចំនួន ៥នាក់ និងមេដាយ​សំរឹទ្ធ​ចំនួន ​៥​នាក់ និងទទួលបាន ពានមាស១ ប្រាក់១ និងសំរឹទ្ធមួយផងដែរ ដែល​នីតិ​វិធី​នៃ​​ការ​ប្រឡង​មាន​ពីរ​ប្រភេទ​គឺ​ ១. ប្រឡងផ្ទាល់ជាបុគ្គល និង២​ប្រឡង​ជា​ក្រុម។ កម្មវិធីនេះដឹកនាំក្រុមដោយ ឯក​ឧ​ត្តមបណ្ឌិត សភាចារ្យ ច័ន្ទ រ័ត្ន ទីប្រឹក្សា​ក្រសួង​អប់រំ យុវជន និងកីឡា ទទួលបន្ទុក​ដេប៉ាតឺម៉ង់​ស្រាវ​ជ្រាវគរុកោសល្យជំនាន់ថ្មី នៃ​វិទ្យាស្ថាន​ជាតិ​អប់រំ​។

សូមបញ្ជាក់ថា កម្មវិធីប្រឡង The Young Master Challenge Global Final 2026 នេះមាន​៣៣​ប្រទេស​ចូលរួម ហើយក្រុមសិស្សជ័យលាភីកម្ពុជា នឹងវិលត្រឡប់​ដល់ក​ម្ពុជា​វិ​ញ​នៅ​រសៀល​ថ្ងៃ​អាទិត្យទី ២៨ ខែមិថុនា ឆ្នាំ២០២៦ វេលាម៉ោង៤ និង១៥នាទី តាមជើងយន្តហោះលេខ QR970​៕ អត្ថបទ៖ គង់ រ៉េន