អង្គការសមុទ្រអន្តរជាតិ (IMO) បាននិយាយថា ការជម្លៀសនាវិកប្រហែល ១១.០០០នាក់ដែលជាប់ខ្លួនដោយសារការបិទច្រកសមុទ្រ Hormuz ត្រូវបានផ្អាកកាលពីថ្ងៃព្រហស្បតិ៍ ទី ២៥ ខែមិថុនា បន្ទាប់ពីការវាយប្រហារលើនាវាមួយគ្រឿងនៅឈូងសមុទ្រអូម៉ង់។

ទីភ្នាក់ងារសមុទ្ររបស់អង្គការសហប្រជាជាតិ បាននិយាយកាលពីដើមសប្តាហ៍នេះថា ទីភ្នាក់ងារនឹងចាប់ផ្តើមជម្លៀសនាវាចំនួន ៦០០ គ្រឿង និងក្រុមនាវិកដែលជាប់ខ្លួនដោយសារសង្គ្រាមអាមេរិក-អ៊ីរ៉ង់ បន្ទាប់ពីទីក្រុងវ៉ាស៊ីនតោន និងទីក្រុងតេអេរ៉ង់ បានព្រមព្រៀងលើកិច្ចព្រមព្រៀងបឋមដើម្បីបញ្ចប់ជម្លោះ។

ប៉ុន្តែនាវាដឹកទំនិញមួយគ្រឿងត្រូវបានបំផ្លាញដោយគ្រាប់ផ្ទុះមិនត្រូវបានគេស្គាល់នៅឆ្នេរសមុទ្រអូម៉ង់នៅក្នុងច្រកសមុទ្រយុទ្ធសាស្ត្រកាលពីថ្ងៃព្រហស្បតិ៍ ដែលជំរុញឱ្យអង្គការសមុទ្រអន្តរជាតិ(IMO) បញ្ឈប់ប្រតិបត្តិការ។

លោក Arsenio Dominguez អគ្គលេខាធិការអង្គការសមុទ្រអន្តរជាតិ(IMO) បាននិយាយនៅក្នុងសេចក្តីថ្លែងការណ៍មួយថា «ខ្ញុំបានសម្រេចផ្អាកជាបណ្តោះអាសន្នការអនុវត្តផែនការជម្លៀស ដើម្បីបញ្ជាក់ជាថ្មីថា ការធានាសុវត្ថិភាពជាចាំបាច់នៅតែបន្តមានសម្រាប់នាវានៅក្នុងបញ្ជីជម្លៀសរបស់យើង និងនាវាទាំងអស់នៅក្នុងតំបន់»។

លោក Dominguez បាននិយាយថា នាវាដែលរងការវាយប្រហារកាលពីថ្ងៃព្រហស្បតិ៍ មិនបានធ្វើដំណើរក្រោមក្របខណ្ឌនៃការជម្លៀសរបស់អង្គការ IMO ដែលបានចាប់ផ្តើមកាលពីល្ងាចថ្ងៃអង្គារនោះទេ។

កាលពីថ្ងៃព្រហស្បតិ៍ ឆ្មាំបដិវត្តន៍អ៊ីរ៉ង់បានព្រមានប្រឆាំងចំពោះការឆ្លងកាត់ច្រកសមុទ្រ Hormuz ដោយគ្មានការអនុញ្ញាត និងបាននិយាយថា នាវាដែលមិនគោរពតាមនឹងត្រូវរងមហន្តរាយ។