ទីភ្នាក់ងារសារព័ត៌មានកូរ៉េខាងជើង KCNA បានរាយការណ៍នៅថ្ងៃសុក្រ២៦មិថុនានេះថា មេដឹកនាំកូរ៉េខាងជើង គីម ជុងអ៊ុន (Kim Jong Un)បានត្រួតពិនិត្យការធ្វើតេស្តអាវុធសំខាន់ៗកាលពីថ្ងៃព្រហស្បតិ៍២៥មិថុនាសប្ដាហ៍នេះ ដែលជាផ្នែកមួយនៃគោលដៅរបស់ប្រទេសនេះសម្រាប់ការធ្វើទំនើបកម្មកម្មវិធីមីស៊ីលរបស់ខ្លួន។

KCNA បាននិយាយថា ការធ្វើតេស្តទាំងនេះពាក់ព័ន្ធនឹងទម្រង់ជាក់លាក់ដែលបានធ្វើឱ្យប្រសើរឡើងនៃប្រព័ន្ធជើងទម្របាញ់រ៉ូកែតពហុជំនាញ ២៤០មីលីម៉ែត្រ ២៤កាណុង មីស៊ីលផ្លោងតាកទិក និងកាំភ្លើងធំស្វ័យប្រវត្តិ ១៥៥ មីលីម៉ែត្រ។

របាយការណ៍របស់ប្រព័ន្ធផ្សព្វផ្សាយនេះបាននិយាយថា ជើងទម្របាញ់គ្រាប់រ៉ូកែតដែលបានធ្វើទំនើបកម្មនេះត្រូវបានបំពាក់ដោយប្រព័ន្ធណែនាំភាពជាក់លាក់ស្វ័យប្រវត្តិ ជាមួយនឹងរយៈចម្ងាយរបស់វាដល់ ៩០ គីឡូម៉ែត្រ។

យោងតាម KCNA ដោយបង្ហាញពីការពេញចិត្តនឹងលទ្ធផលនៃការសាកល្បង លោក Kim បាននិយាយថា ទីក្រុងព្យុងយ៉ាងកំពុងបន្តស្វ័យប្រវត្តិកម្ម សមត្ថភាពរយៈចម្ងាយឆ្ងាយ និង ភាពជាក់លាក់ខ្ពស់ នៅក្នុងកម្មវិធីអាវុធរបស់ខ្លួន ។

លោកថា គោលដៅគឺសម្រាប់ការពារខ្លួនតាមបណ្តោយព្រំដែនភាគខាងត្បូងរបស់ខ្លួន ដោយសំដៅទៅលើព្រំដែនជាមួយកូរ៉េខាងត្បូង។

កាលពីខែឧសភា កូរ៉េខាងជើងបាននិយាយថា ខ្លួនបានសាកល្បងមីស៊ីលផ្លោងតាកទិក គ្រាប់រ៉ូកែតកាំភ្លើងធំ និងមីស៊ីលតម្រង់គោលដៅប្រើបច្ចេកវិទ្យា AI មានភាពជាក់លាក់ខ្ពស់ ដែលត្រូវផលិតឡើងសម្រាប់សង្គ្រាមសម័យទំនើប។ ទីក្រុងព្យុងយ៉ាងបាននិងកំពុងធ្វើទំនើបជាលំដាប់នូវអាវុធតាកទិក និងអាវុធធម្មតារបស់ខ្លួន ដោយសន្យាថានឹងដាក់ពង្រាយនៅជិតព្រំដែនជាមួយកូរ៉េខាងត្បូង៕