អ៊ីរ៉ាក់ បាននិយាយកាលពីថ្ងៃព្រហស្បតិ៍ ២៥មិថុនាសប្ដាហ៍នេះ ថាទីក្រុង បាកដាដ (Baghdad )ចង់ឱ្យ OPEC បង្កើនកូតាផ្គត់ផ្គង់ប្រេងរបស់ប្រទេសនេះយ៉ាងច្រើន បន្ទាប់ពីមានរបាយការណ៍ថាខ្លួននឹងពិចារណាចាកចេញពីក្រុមប្រទេសផលិតប្រេង ដោយសារតែជម្លោះនេះ។

ក្នុងនាមជាប្រទេសនាំចេញប្រេងធំជាងគេទីពីរនៅក្នុងក្រុមនេះ ប្រទេសអ៊ីរ៉ាក់មានឥទ្ធិពលយ៉ាងសំខាន់លើអង្គការ OPEC ដែលបានមើលឃើញប្រទេសផលិតប្រេងធំជាងគេទីបីរបស់ខ្លួន គឺអារ៉ាប់រួមបានចាកចេញកាលពីខែមេសាឆ្នាំនេះ។

ការព្រមាននេះកើតឡើងបន្ទាប់ពីសារព័ត៌មាន Reuters បានរាយការណ៍ថា ប្រទេសអ៊ីរ៉ាក់កំពុងថ្លឹងថ្លែងការចាកចេញពីក្រុមប្រទេសនេះ ហើយសារព័ត៌មាន Bloomberg បានដកស្រង់សម្តីអ្នកនាំពាក្យក្រសួងចាស់របស់អ៊ីរ៉ាក់ដែលបានព្រមានថា ការសម្រេចចិត្តនឹងត្រូវធ្វើឡើងទាក់ទងនឹងថាតើត្រូវនៅឬដកខ្លួនចេញ ប្រសិនបើកូតាប្រេងមិនត្រូវបានដំឡើង។

ក្រសួងប្រេងរបស់អ៊ីរ៉ាក់បាននិយាយនៅពេលក្រោយនៅថ្ងៃព្រហស្បតិ៍ដដែលថា របាយការណ៍ដែលបង្ហាញថាទីក្រុងបាកដាដអាចបញ្ចប់សមាជិកភាពរបស់ខ្លួននៅក្នុង OPEC "មិនបានឆ្លុះបញ្ចាំងពីជំហរផ្លូវការរបស់រដ្ឋាភិបាលអ៊ីរ៉ាក់ទេ" ប៉ុន្តែបានបន្ថែមថាខ្លួននៅតែបន្តសង្កត់ធ្ងន់លើសារៈសំខាន់នៃការពិនិត្យឡើងវិញនូវកូតាផលិតកម្មប្រេង។

ទាំងក្រសួងអ៊ីរ៉ាក់ និង OPEC ពុំអាចឆ្លើយតបដោយផ្ទាល់ចំពោះសំណើសុំការត្ថាធិប្បាយពីទូរទស្សន៍ CNBC បានទេ។

សេដ្ឋកិច្ចរបស់ប្រទេសអ៊ីរ៉ាក់ពឹងផ្អែកយ៉ាងខ្លាំងទៅលើប្រេង ហើយការពឹងផ្អែករបស់ខ្លួនលើការនាំចេញតាមរយៈឈូងសមុទ្រពែក្សត្រូវបានរងផលប៉ះពាល់ ចាប់តាំងពីសហរដ្ឋអាមេរិក និងអ៊ីស្រាអែលបានចាប់ផ្តើមសង្គ្រាមជាមួយអ៊ីរ៉ង់នៅថ្ងៃទី២៨ ខែកុម្ភៈឆ្នាំ២០២៦នេះ ៕