នាយករដ្ឋមន្ត្រី លោកស្រី Giorgia Meloni បាននិយាយកាលពីថ្ងៃព្រហស្បតិ៍ ទី២៥ ខែមិថុនា ថា អ៊ីតាលី និងបារាំង បានព្រមព្រៀងគ្នាបង្កើតក្រុមចម្រុះមួយដើម្បីគាំទ្រប្រទេសលីបង់ បន្ទាប់ពីគំនិតផ្តួចផ្តើម កងរក្សាសន្តិភាពរបស់កងកម្លាំងបណ្តោះអាសន្នអង្គការសហប្រជាជាតិនៅលីបង់ (UNIFIL) ផុតអាណត្តិនៅចុងឆ្នាំនេះ។

ថ្លែងនៅទីក្រុងរមណីយដ្ឋាន Antibes របស់ប្រទេសបារាំង បន្ទាប់ពីបានជួបពិភាក្សាជាមួយប្រធានាធិបតីបារាំង លោក Emmanuel Macron លោកស្រី Meloni បាននិយាយថា ភាគីទាំងពីរក៏បានពិភាក្សាអំពីសន្និសីទអន្តរជាតិដែលអាចធ្វើឡើងលើបញ្ហានេះ។

លោកស្រី Meloni បានថ្លែងនៅក្នុងសន្និសីទសារព័ត៌មានរួមជាមួយលោក Macron ថា «ដូចអ្នកបានដឹងហើយ នៅចុងឆ្នាំនេះ បេសកកម្មរបស់កងកម្លាំងបណ្តោះអាសន្នអង្គការសហប្រជាជាតិនៅលីបង់ (UNIFIL) នឹងបញ្ចប់ ហើយវាចាំបាច់ខ្លាំង តាមទស្សនៈរបស់យើង ត្រូវមានការធានាវត្តមានអន្តរជាតិ ដែលបញ្ចៀសភាពចន្លោះប្រហោងសន្តិសុខដ៏គ្រោះថ្នាក់»។

លោក Macron បាននិយាយថា វាលឿនពេកក្នុងការកំណត់ថាតើក្រុមចម្រុះនេះ អាចតម្រូវឱ្យមានអាណត្តិសម្រាប់កងកម្លាំងពហុជាតិសាសន៍ ដែលធ្វើប្រតិបត្តិការរួមគ្នាជាមួយកងទ័ពលីបង់ ឬកងកម្លាំងដែលបង្កើតឡើងជាមួយអង្គការសហប្រជាជាតិ។ លោកនិយាយថា បំណងរបស់យើងគឺដើម្បីធានាបានអាណត្តិច្បាស់លាស់បំផុត បេសកកម្មដ៏មានប្រសិទ្ធភាពបំផុត និងការចូលរួមយ៉ាងទូលំទូលាយបំផុតនៅក្នុងក្រុមចម្រុះបែបនេះ ព្រោះគោលដៅរបស់យើងគឺអធិបតេយ្យភាពរបស់ប្រទេសលីបង់ និងបូរណភាពទឹកដីរបស់ប្រទេសនេះ។