អ៊ុយក្រែន៖ ​ទាហាន​​អ៊ុយក្រែន​​ ​ដែលបាន​​​សំងំលាក់ខ្លួន ​នៅក្នុង​រោងចក្រ​ដែកថែប Azovstal ​​​​ ក្នុងទីក្រុង​ Mariupol ​បាន​អំពាវនាវដល់​បណ្ដា​ប្រទេស​លោកខាងលិច​​ជួយ​សង្រ្គោះមនុស្សគ្រប់គ្នា​​​ដែល​កំពុងជាប់​​ក្នុង​បរិវេណ​នោះ ខណៈកងកម្លាំង​សម្ព័ន្ធមិត្ត​ បានអំពាវនាវ​ដូចគ្នា​នេះដែរ​​​នៅទីក្រុង Dunkirk ​ក្នុង​ប្រតិបត្តិការ​​ប្រៀបដូចជា​សង្គ្រាម​លោកលើកទី២​ ដ៏ល្បីល្បាញ​។

មេបញ្ជាការ​​​កងទ័ព​អ៊ុយក្រែន លោក Serhiy Volyna ស្ថិតក្នុងចំណោម​​​​កងម៉ារីន​អ៊ុយក្រែន​ ដែល​កំពុងការពារ​​ទីក្រុងនេះ ​ពី​ការ​វាយ​លុក​របស់រុស្ស៊ី​ បាន​ជំរុញដល់បណ្ដា​មេដឹកនាំ​​លោកខាងលិច​ជួយរំដោះ​​​កងទ័ព​​​​​​ក្នុង​ទីក្រុង Mariupol ​និងបន្ត​​ជួយ​សង្គ្រោះ​​ជនស៊ីវិល​ ​​និង​កងទ័ព​​រាប់រយនាក់​ដែល​បានជាប់​​ក្នុង​រោងចក្រ​ដែក​ថែបនេះ។​

លោក Volyna ​បាននិយាយថា ​​ទាហាន​​អ៊ុយក្រែន​​ជាង​ ៦០០នាក់ បាន​រងរបួស​ និងមាន​ជនស៊ីវិលរាប់រយនាក់​​​រួមទាំង​កុមារ​ កំពុងជាប់ក្នុង​រោងចក្រ​ដែកថែប ដែលជា​​មូលដ្ឋាន​ចុងក្រោយ​​​របស់ក្រុមអ្នកតស៊ូអ៊ុយក្រែន​ ក្នុងទីក្រុង​កំពង់ផែយុទ្ធសាស្ត្រនេះ​៕ ​​