ប្រទេសកោះស៊ីបកាលពីថ្ងៃព្រហស្បតិ៍បានសម្តែងការព្រួយបារម្ភថា ខ្លួនអាចនឹងមិនត្រូវបានអញ្ជើញឲ្យ ចូលរួមសន្និសីទអាកាសធាតុរបស់អង្គការសហប្រជាជាតិនៅក្នុងខែវិច្ឆិកា ដោយសារតែជម្លោះយូរអង្វែងជាមួយប្រទេសម្ចាស់ផ្ទះ គឺទួរគី។

កោះស៊ីបត្រូវបានបែងចែក ចាប់តាំងពីឆ្នាំ ១៩៧៤ នៅពេលដែលការឈ្លានពានរបស់ទួរគី បានកើតឡើងបន្ទាប់ពីរដ្ឋប្រហារនៅរដ្ឋធានី Nicosia ដែលគាំទ្រដោយរបបយោធាក្រិក នៅពេលនោះ។ សាធារណរដ្ឋ ទួរគីនៃកោះស៊ីបខាងជើង ដែលបានប្រកាសនៅឆ្នាំ ១៩៨៣ ត្រូវបានទទួលស្គាល់ដោយទីក្រុងអង់ការ៉ាតែប៉ុណ្ណោះ។

សាធារណរដ្ឋកោះស៊ីបដែលទទួលស្គាល់ដោយអន្តរជាតិ ជាសមាជិកនៃសហភាពអឺរ៉ុប គ្រប់គ្រងភាគខាងត្បូងនៃកោះស៊ីបក្រិកភាគច្រើន ប៉ុន្តែមិនត្រូវបានទទួលស្គាល់ដោយទួរគីទេ ដែលនឹងធ្វើជាម្ចាស់ផ្ទះ នៃសន្និសីទ COP31 នាខែវិច្ឆិកា នៅក្នុងទីក្រុង Antalya ភាគខាងត្បូង។

រដ្ឋមន្ត្រីក្រសួងបរិស្ថានកោះស៊ីប លោកស្រី Maria Panayiotou បាននិយាយបន្ទាប់ពីជួបជាមួយសមភាគីរបស់ខ្លួន នៅប្រទេសលុចសំបួរថា៖«យើងមានការព្រួយបារម្ភដោយព័ត៌មានដែលបង្ហាញថា ប្រទេសទួរ មានបំណងអញ្ជើញតែរដ្ឋសមាជិកសហភាពអឺរ៉ុបចំនួន ២៦ ប៉ុណ្ណោះឲ្យចូលរួមសន្និសីទ COP31»៕