សំឡេងស្រែក និងតម្អូញ​ បានលាន់រំពង​​ឡើងពីក្រោមគំនរបេតុង និងឥដ្ឋ កាល​ពី​​ព្រឹកព្រលឹមថ្ងៃព្រហស្បតិ៍ (ទី២៥ ខែមិថុនា ឆ្នាំ២០២៦) ខណៈដែលអ្នក​ស្រុក​កំពុងស្វែងរកអ្នករស់រានមានជីវិត នៅក្នុងទីក្រុងឆ្នេរសមុទ្រ Catia La Mar របស់រដ្ឋ La Guaira ​ ជាកន្លែងដែលក្រុមជួយសង្គ្រោះ មិនទាន់បានទៅដល់អគារដួលរលំជាច្រើនកន្លែងដោយ​មាន​រយៈពេល​ជិត ១០​ម៉ោងហើយ​បន្ទាប់ពីរញ្ជួយដី ២លើក​បន្ត​គ្នា​ បានវាយប្រហារប្រទេសវ៉េណេស៊ុយអេឡា​។

រដ្ឋឆ្នេរសមុទ្រ La Guaira ដែលមានប្រជាជនរស់នៅប្រហែល ៥០០.០០០នាក់ និងមានទីតាំងស្ថិតនៅចម្ងាយប្រហែល ៣០​គីឡូម៉ែត្រ នៅ​ភាគខាងជើងនៃទីក្រុងការ៉ាកាស គឺជាតំបន់មួយ ក្នុងចំណោមតំបន់រងប៉ះពាល់ខ្លាំងបំផុតដោយសារ​គ្រោះរញ្ជួយដីកម្រិត ៧,២ និង ៧,៥រ៉ិចទ័រ ដែលបានកើត​ឡើង​កាល​ពី​ល្ងាចថ្ងៃទី២៤ ខែមិថុនា។

តំបន់នេះ ដែលធ្លាប់បានជួប​ប្រទះ​នឹង​មហន្តរាយ​គ្រោះធម្មជាតិដ៏បំផ្លិច​បំផ្លាញ​ពីមុន មានមនុស្សច្រើនកុះករជាពិសេស ពីព្រោះ​ថ្ងៃឈប់សម្រាកបុណ្យ​ជាតិ កាល​ពី​ថ្ងៃទី២៤ ខែមិថុនា បានទាក់ទាញមនុស្សរាប់ពាន់នាក់ទៅកាន់ឆ្នេរសមុទ្រ។ វីដេអូពីលើ​ឧទ្ធម្ភាគចក្រ បានបង្ហាញឲ្យ​ឃើញ​ប្លុកទាំងមូល នៅក្នុងសង្កាត់ Playa Grande, Tanaguarenas និង Los Corales ក្លាយទៅជាគំនរបាក់បែក។

រដ្ឋមន្ត្រីក្រសួងសុខាភិបាល លោក Carlos Alvarado កាលពីថ្ងៃព្រហស្បតិ៍ បាន​បញ្ជាក់​ថា ចំនួនអ្នកស្លាប់ក្នុងហេតុការណ៍​រញ្ជួយដីជាប់ៗគ្នានេះ​ បានកើនឡើងដល់យ៉ាង​តិច​ ២៣៥នាក់ ហើយ​អ្នករងរបួសជាង ៤.៣០០នាក់​។ លោក Alvarado បានបង្ហាញថា អ្នកស្លាប់ និង​របួស ឬរបួសធ្ងន់ធ្ងរ ភាគច្រើន​មាន​នៅក្នុងរដ្ឋឆ្នេរសមុទ្រ La Guaira។

ចំណែក​ប្រធានរដ្ឋសភា Jorge Rodriguez បានប្រកាសថា អ្នកវិទ្យាសាស្ត្ររញ្ជួយដី បានកត់ត្រារលក​រញ្ជួយបន្ថែមយ៉ាង​ហោចណាស់ ១៣៨​ដង ចាប់តាំងពីរញ្ជួយដីធំ​ ២លើកនោះ​។ លោក Rodriguez បានកត់សម្គាល់ថា ការរញ្ជួយដីនេះបានធ្វើឲ្យ​ខូចខាតហេដ្ឋារចនាសម្ព័ន្ធយ៉ាង​ហោចណាស់​ ៣៤៦កន្លែង​ រួមទាំងអគារផ្ទះល្វែងចំនួន ២៥០​ខ្នង និងមជ្ឈមណ្ឌលផ្សារទំនើបចំនួន​ ២០ ដែល​ភាគច្រើ​ននៅទីក្រុង​របស់រដ្ឋ​​ La Guaira៕