រដ្ឋាភិបាល​អ៊ីស្រាអែល និង​លីបង់ ​កំពុង​ពិភាក្សា​អំពី​ទីតាំង ​សម្រាប់​តំបន់​ដែលត្រូវបាន​​ស្នើ​ឡើង​ដោយ​សហរដ្ឋអាមេរិក ​នៅ​ភាគ​ខាងត្បូងនៃ​​ប្រទេស​លីបង់ ដែល​ទីក្រុង​បេរូត​អាច​បង្ហាញ​ពី​សមត្ថភាព​របស់​ខ្លួន​ក្នុង​ការ​ទប់ស្កាត់​ក្រុម​ហេសបូឡា។

ការចរចា​ដែល​បាន​ធ្វើ​ឡើង​នៅ​ទីក្រុង​វ៉ាស៊ីនតោន ​ក្នុង​រយៈពេល​ប៉ុន្មាន​សប្តាហ៍​ថ្មីៗ​នេះ ត្រូវ​បាន​ជំរុញ​ដោយ​កិច្ចព្រមព្រៀង​សន្តិភាព​បណ្តោះអាសន្ន​ រវាង​សហរដ្ឋអាមេរិក និង​អ៊ីរ៉ង់។ ហើយ​រដ្ឋបាលរបស់​​លោកប្រធានាធិបតី Donald Trump បាន​ជំទាស់​នឹង​​​ការទាមទារ​របស់​ទីក្រុង​តេអេរ៉ង់ ​ដែល​ថា ការចរចា​ដាច់ដោយឡែក​ រវាង​សហរដ្ឋអាមេរិក និង​អ៊ីរ៉ង់ ​រួមបញ្ចូល​ទាំង​​ការបញ្ចប់​ប្រតិបត្តិការ​របស់​អ៊ីស្រាអែល​ ប្រឆាំងនឹង​ក្រុម​ហេសបូឡា។ តែ​ទោះជាយ៉ាងណានេះ​ក្ដី​ ក៏​មន្ត្រី​អាមេរិក​បាន​ជំរុញ​សម្ព័ន្ធមិត្ត​របស់ខ្លួន ​គឺ​អ៊ីស្រាអែល​ ឲ្យ​បង្ហាញ​ការអត់ធ្មត់ និង​ព្យយាម​សម្រេចបាន​​សន្តិភាព​ជាមួយ​លីបង់ ក្នុង​ពេល​ស្រប​គ្នា​។

មន្ត្រី​អ៊ីស្រាអែល​ម្នាក់​ដែល​បាន​ស្នើសុំ​មិន​បញ្ចេញ​ឈ្មោះ ​បាន​និយាយ​ថា ការចរចា​ជុំ​ចុងក្រោយ​ជាមួយ​លីបង់ ដែល​បាន​ចាប់ផ្តើម​នៅ​ថ្ងៃទី២៣ ខែមិថុនា និង​​បញ្ចប់​នៅ​ថ្ងៃទី២៥ ខែមិថុនា ត្រូវ​បាន​រារាំង​ដោយ​ការមិនចុះសម្រុង​គ្នា ជុំវិញបញ្ហា​​​ភូមិសាស្ត្រ។

មន្ត្រី​រូប​នេះ​បាន​បន្ថែម​​ថា រដ្ឋាភិបាល​លីបង់​ចង់​បាន​​យ៉ាងហោចណាស់​តំបន់មួយ​ចំនួនដែល​ឲ្យ​ឈ្មោះ​​ថា តំបន់​សាកល្បង ស្ថិត​នៅក្នុង​រង្វង់​តំបន់​ទ្រនាប់ជ្រៅ​ឆ្ងាយ​ ១០គីឡូម៉ែត្រ​ តាម​បណ្តោយ​ព្រំដែន​ជាមួយ​អ៊ីស្រាអែល ដែល​ឥឡូវនេះ​ត្រូវបាន​ល្បាត​ដោយ​កងកម្លាំង​ការពារជាតិ​​អ៊ីស្រាអែល (IDF)។ តែ​អ៊ីស្រាអែលបានបដិសេធគំនិតនោះ ដោយនិយាយថា ទីក្រុងបេរូតអាចដាក់ពង្រាយកងកម្លាំងប្រដាប់អាវុធលីបង់ (LAF) នៅកន្លែងផ្សេងទៀត នៅភាគខាងត្បូងនៃទន្លេ Litani ជា​ទី​តាំង​កំណត់ព្រំដែនគោក​ដែលធ្លាប់ជាទីតាំង​ដ៏សំខាន់​របស់ក្រុម​ហេសបូឡា​ជាយូរមកហើយ។

ស្ថានទូតលីបង់ ប្រចាំ​នៅទីក្រុងវ៉ាស៊ីនតោន មិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ​។ កាល​ពី​ថ្ងៃទី២៥ ខែមិថុនា រដ្ឋមន្ត្រីការបរទេសអាមេរិក លោក Marco Rubio បាននិយាយថា កិច្ចព្រមព្រៀងអ៊ីស្រាអែល-លីបង់ដំបូង ត្រូវបានគេរំពឹងថា នឹងកើតឡើងឆាប់ៗនេះ៕