ភ្នំពេញ៖ លោក លាង ដឺលុច អ្នកសារព័ត៌មានជើងចាស់មួយរូបនៅកម្ពុជា បានបញ្ចេញនូវវណ្ណកម្មថ្មីមួយរបស់ខ្លួនក្រោមចំណងជើងថា «ក្ដីសង្ឃឹម ហ៊ុន ម៉ានី» បន្ទាប់ពីលោកបានចំណាយពេលតាមដាន អង្កេត ស្រាវជ្រាវ ជាង៨ឆ្នាំ អំពីតួអង្គ ហើយចំណាយពេល ២ឆ្នាំបន្ថែមទៀត ក្នុងការសរសេររៀបរៀងខ្លឹមសារ។

សៀវភៅដែលមានចំណងជើងថា «ក្ដីសង្ឃឹម ហ៊ុន ម៉ានី» ត្រូវបានស្មេរដែលមានបទពិសោធន៍​សរសេរ​ជាង ២០ឆ្នាំ ក្នុងវិស័យសារព័ត៌មានរូបនេះ រំលេចឱ្យអ្នកអានបានជ្រាបអំពីបុគ្គលិកលក្ខណៈ និងដំណើរជីវិតរបស់ ឯកឧត្តម ហ៊ុន ម៉ានី ដែលជាអ្នកតំណាងរាស្រ្តមណ្ឌលកំពង់ស្ពឺ ព្រមទាំង​ជា​កូនប្រុសពៅរបស់នាយករដ្ឋមន្រ្តីដ៏មានឥទ្ធិពលរបស់កម្ពុជា។

ខ្លឹមសារនៃសៀវភៅកម្រាស់ ២៥៥ ទំព័រ នេះ ក៏បានចងក្រងនូវភាគច្រើននូវព័ត៌មាននៃការចូល​ប្រឡូក​ក្នុងវិស័យសង្គម និងឆាកនយោបាយរបស់ឯកឧត្តម ហ៊ុន ម៉ានី ដែលជាប្រធាន​នៃ​ចលនា​យុវជន​ដ៏ធំមួយ​នៅកម្ពុជា និងបានបង្ហាញពីចក្ខុវិស័យ ឆន្ទៈ ព្រមទាំងការប្ដេជ្ញាចិត្តក្នុងភាពជា​អ្នកដឹកនាំ​របស់អ្នកនយោបាយវ័យក្មេង​ដ៏មានប្រជាប្រិយភាព និងមានឥទ្ធិពលនាពេលអនាគត​មួយរូបរបស់កម្ពុជាផងដែរ។

តាមរយៈខ្លឹមសាររាប់ម៉ឺនពាក្យក្នុងសៀវភៅនេះ អ្នកនិពន្ធ រំពឹងថាអ្នកអាន មិនត្រឹមតែជ្រាបកាន់​តែច្បាស់​អំពីតួអង្គ ​ឯកឧត្តម ហ៊ុន ម៉ានី ប៉ុណ្ណោះទេ អ្នកអានក៏បានស្គាល់អំពីបុគ្គលិកលក្ខណៈរបស់​កំពូល​មេដឹកនាំកម្ពុជា​តាមរយៈកូនប្រុសរបស់លោកផងដែរ៕ អត្ថបទ៖ ចេន សុជាតា