យន្តហោះកងទ័ពអាកាសឈីលីដឹកក្រុមដែលជំនាញខាងរុករក និងជួយសង្រ្គោះ ជាមួយនឹងសម្ភារៈរបស់ពួកគេ បានធ្វើដំណើរទៅដល់ទីក្រុង Valencia របស់វេណេស៊ុយអេឡា នាព្រឹកថ្ងៃសុក្រនេះ ដើម្បីគាំទ្រដល់កិច្ចខិតខំជួយសង្រ្គោះនៅក្នុងប្រទេសដែលរងផលប៉ះពាល់ដោយសារការរញ្ជួយដីនេះ ។

អនុរដ្ឋមន្រ្តីវេណេស៊ុយអេឡាទទួលបន្ទុកកិច្ចការអាមេរិកឡាទីនលោក Mauricio Rodriguez Gelfenstein បានស្វាគមន៍គណៈប្រតិភូឈីលី ។

នៅថ្ងៃសុក្រនេះដែរ អេស្ប៉ាញបានបញ្ជូនយន្តហោះយោធាមួយគ្រឿងដឹកក្រុមជួយសង្រ្គោះ ៥៩នាក់ និងអង្គភាពសុនខហិតក្លិន ៨ក្បាល ដើម្បីគាំទ្រប្រតិបត្តិការរុករក និងជួយសង្រ្គោះ នៅក្នុងប្រទេសមួយនេះ ។

យន្តហោះ A330 បានហោះចេញពីមូលដ្ឋានទ័ពអាកាស Torrejon de Ardoz ស្ថិតនៅជិតទីក្រុង Madrid កាលពីវេលាម៉ោង ៣ព្រឹកទាបភ្លឺ ថ្ងៃសុក្រនេះ ។

គួរឲ្យដឹងថា ការរញ្ជួយដីដ៏ខ្លាំងក្លា ២លើក បានសម្លាប់មនុស្សយ៉ាងហោច ២៣៥នាក់ និងបានធ្វើឲ្យអគារជាច្រើនខ្នងនៅទូទាំងតំបន់ភាគខាងជើងវេណេស៊ុយអេឡា រាបដល់ដីកាលពីថ្ងៃពុធ ហើយនិងធ្វើឲ្យមនុស្សរាប់ម៉ឺននាក់ គ្មានផ្ទះសម្បែងរស់នៅ ក្នុងនោះមនុស្សជាច្រើនទៀត កំពុងបាត់ខ្លួន និងជាប់ក្រោមគំនរបាក់បែកអគារ ៕