នៅថ្ងៃសុក្រ (ទី២៦ ខែមិថុនា ឆ្នាំ២០២៦) នេះ នាយករដ្ឋមន្ត្រីអូស្ត្រាលី បាន​បញ្ជាក់​ថា លោកចង់ធ្វើឲ្យប្រាកដថា ការហាមឃាត់បណ្ដាញ​សង្គម សម្រាប់កុមាររបស់ប្រទេសនេះ មានភាពរឹងមាំតាមដែលអាចធ្វើទៅបាន ខណៈដែលការសិក្សាថ្មីមួយ បានរកឃើញថា វិធានការនេះ មានផលប៉ះពាល់តិចតួច ចំពោះ​ការប្រើប្រាស់របស់ក្មេងជំទង់ ដោយ​នោះ​ជាលើកដំបូងនៃការ​វាយតម្លៃ​បែបនេះ​ លើ​បម្រាម​ដែល​ឥឡូវនេះមានរយៈពេល ៦ខែហើយ​។

រដ្ឋាភិបាលមានគម្រោងធ្វើតេស្តកាន់​តែតឹង​រ៉ឹង លើច្បាប់ដែលហាមឃាត់វេទិកានានា ដូចជា Instagram របស់ក្រុម​ Meta និង YouTube របស់ក្រុមហ៊ុន​ Google កុំ​ឲ្យ​អនុញ្ញាតដល់​ការ​បង្កើត​គណនីអាយុក្រោម ១៦ឆ្នាំ។

នាយករដ្ឋមន្ត្រី លោក Anthony Albanese បានប្រាប់ប្រព័ន្ធ​ផ្សព្វផ្សាយ​ Australian Broadcasting Corp ថា៖ «អ្វីដែលយើងចង់ធ្វើ គឺធ្វើឱ្យប្រាកដថា ច្បាប់មានភាពរឹងមាំតាមដែលអាចធ្វើទៅបាន ហើយថា ការងារ​នោះ​នឹងទប់ទល់នឹងបញ្ហាប្រឈមផ្នែកច្បាប់ណាមួយដែលត្រូវបានធ្វើឡើង»។

លោកបានបន្ថែមថា ការផ្តោតសំខាន់មួយនឹងធ្វើឲ្យ​ប្រាកដថា គណៈកម្មការសុវត្ថិភាពអេឡិចត្រូនិក (eSafety Commission) ដែលជានិយតករប្រព័ន្ធ​អ៊ីនធឺណិតរបស់ប្រទេស មានអំណាចគ្រប់គ្រាន់ ដើម្បីធ្វើការងារនេះ។ យ៉ាងណាក្ដី លោក Albanese មិនបានផ្តល់ព័ត៌មានលម្អិតបន្ថែម អំពីជំហាន ដែលរដ្ឋាភិបាលនឹងអនុវត្តនោះទេ ហើយនិយតករបានបដិសេធមិនធ្វើអត្ថាធិប្បាយអ្វី​ឡើយ​។

នៅពេលដែលការហាមឃាត់របស់ប្រទេសអូស្ត្រាលី បានចូល​ជា​ធរមាន​កាលពីខែធ្នូឆ្នាំមុន មានរបាយការណ៍ដំបូងៗថា ខ្លួនបានបិទគណនីរាប់លាន ប៉ុន្តែឪពុកម្តាយ បាននិយាយ ហើយការសិក្សា បានបង្ហាញថា ការប្រើប្រាស់បណ្ដាញ​សង្គមរបស់ក្មេងជំទង់មានការផ្លាស់ប្តូរតិចតួចប៉ុណ្ណោះ៕