ប្រទេសអូស្ត្រាលី កំពុងពិចារណាលើការអនុវត្តកាន់តែតឹងរ៉ឹងច្បាប់ហាមឃាត់បណ្តាញផ្សព្វផ្សាយសង្គមដំបូងបំផុតរបស់ពិភពលោកសម្រាប់កុមារ។ បម្រាម ដែលបានចូលជាធរមានកាលពី៦ខែកន្លងទៅនេះ បានបញ្ឈប់វេទិកាដូចជា Instagram និង YouTube មិនអនុញ្ញាតឱ្យកុមារអាយុក្រោម១៦ឆ្នាំមានគណនី។ ទោះជាយ៉ាងណា ការសិក្សាថ្មីមួយបានរកឃើញថា វាមានផលប៉ះពាល់តិចតួច។

នៅពេលដែលបម្រាមបានចាប់ផ្តើមកាលពីក្នុងខែធ្នូ តាមសេចក្តីរាយការណ៍ គណនីរាប់លានត្រូវបានបិទ។ ប៉ុន្តែឪពុកម្តាយ និងការសិក្សានិយាយថាការប្រើប្រាស់របស់ក្មេងជំទង់ ពុំមានការផ្លាស់ប្តូរច្រើនទេ។ ឯកសារមួយដែលបានចេញផ្សាយនៅក្នុង British Medical Journal ក្នុងសប្តាហ៍នេះ បាននិយាយថា ៨៥% នៃពលរដ្ឋអូស្ត្រាលីដែលមានអាយុពី១២ ទៅ១៥ឆ្នាំនៅតែប្រើប្រាស់បណ្តាញផ្សព្វផ្សាយសង្គម បីខែបន្ទាប់ពីការហាមឃាត់។ ការសិក្សាលើក្មេងជំទង់ចំនួន ៤០៨ នាក់ បានបង្ហាញថា ពួកគេភាគច្រើនគ្រាន់តែនិយាយកុហកអំពីអាយុរបស់ខ្លួន។ នាយករដ្ឋមន្ត្រីអូស្ត្រាលី លោក Anthony Albanese បានពន្យល់ពីមូលហេតុដែលរដ្ឋាភិបាលនឹងពិនិត្យឡើងវិញនូវច្បាប់នេះថា៖ «អ្វីដែលយើងចង់ធ្វើគឺធ្វើឱ្យប្រាកដថា ច្បាប់មានភាពរឹងមាំតាមដែលអាចធ្វើទៅបាន ហើយពួកគេនឹងទប់ទល់បញ្ហាប្រឈមផ្លូវច្បាប់ណាមួយដែលត្រូវបានធ្វើឡើង។ ទាំងនេះពុំមែនគ្មានរឿងចម្រូងចម្រាសនោះទេ។ ទោះជាយ៉ាងណា នៅពេលដែលខ្ញុំនិយាយដូច្នេះ វាពុំមែនជារឿងចម្រូងចម្រាសក្នុងចំណោមសាធារណជនអូស្ត្រាលី និងក្នុងចំណោមឪពុកម្តាយនោះទេ ព្រោះពួកគេដឹងថា នេះគឺជាបម្រាមធ្វើឡើងមុនគេលើពិភពលោក»។