ប្រទេសចិន នៅ​ថ្ងៃសុក្រ (ទី២៦ ខែមិថុនា ឆ្នាំ២០២៦) នេះ បាន​បញ្ជាក់​ថា ការរក្សាស្ថិរភាព នៅសមុទ្រលឿង និងការគ្រប់គ្រងការនេសាទប្រកប​ដោយការទទួលខុសត្រូវ គឺជាផលប្រយោជន៍រួមរបស់ទីក្រុងប៉េកាំង និងសេអ៊ូល បន្ទាប់ពីប្រធានាធិបតីកូរ៉េខាងត្បូង លោក Lee Jae-myung បានលើកឡើងពីក្ដី​បារម្ភអំពីការនេសាទខុសច្បាប់ដោយនាវារបស់​ចិន។

អ្នកនាំពាក្យក្រសួងការបរទេសចិន លោក Guo Jiakun បានប្រាប់សន្និសីទសារព័ត៌មាននៅទីក្រុងប៉េកាំងថា៖ «ការការពារស្ថិរភាពនៃដែន​សមុទ្រ រវាងចិន និងកូរ៉េ គឺជាផលប្រយោជន៍របស់ភាគីទាំង២ ហើយវាស្ថិតនៅក្នុងផលប្រយោជន៍របស់ភាគីទាំង២ ក្នុងការការពារការនេសាទតាមរបៀបដែលមានសណ្តាប់ធ្នាប់​»។

ឆ្លើយតបទៅនឹងសំណួរ អំពីការកត់សម្គាល់របស់លោក Lee លោក Guo បាននិយាយថា ប្រទេសចិនតម្រូវឱ្យអ្នកនេសាទរបស់ខ្លួន គោរពតាមច្បាប់ និងបទប្បញ្ញត្តិពាក់ព័ន្ធ ខណៈពេលដែលការពារសិទ្ធិ និងផលប្រយោជន៍ស្របច្បាប់របស់ពួកគេ។ លោកបានបន្ថែមថា ទីក្រុងប៉េកាំងបានបន្ត​ការសន្ទនាយ៉ាងជិតស្និទ្ធជាមួយកូរ៉េខាងត្បូង ជុំវិញ​បញ្ហាទាក់ទងនឹងការនេសាទ។

គួរ​បញ្ជាក់​ថា ការអត្ថាធិប្បាយនេះបានកើតឡើងបន្ទាប់ពីលោក Lee បានសម្តែងក្ដី​បារម្ភ លើរបាយការណ៍ដែលថា នាវាចិនបន្តនេសាទខុសច្បាប់នៅក្នុងដែនទឹកភាគខាងលិចនៃប្រទេសកូរ៉េខាងត្បូង។

ប្រទេសចិន និងកូរ៉េខាងត្បូង បានមាន​ជម្លោះម្ដង​កាល​ជាយូរមកហើយ ជុំវិញ​សកម្មភាពនេសាទ នៅសមុទ្រលឿង ជាកន្លែងដែលផលប្រយោជន៍សមុទ្រត្រួតស៊ីគ្នា ជួនកាលបាននាំឲ្យ​មានភាពតានតឹងផ្នែកការទូត និងប្រតិបត្តិការអនុវត្តច្បាប់៕