គិតត្រឹម​ថ្ងៃសុក្រ (ទី២៦ ខែមិថុនា ឆ្នាំ២០២៦) នេះ ចំនួនអ្នកស្លាប់ដោយសារគ្រោះរញ្ជួយដី នៅប្រទេសវ៉េណេស៊ុយអេឡា គឺយ៉ាង​តិចបំផុត ២៣៥នាក់ ដោយ​គេរំពឹងថា ចំនួន​នឹងកើនឡើងយ៉ាងខ្លាំង ក្នុងរយៈពេលប៉ុន្មានម៉ោងខាងមុខ ខណៈ​ដែល​មនុស្សជាង ៥០.០០០នាក់ ត្រូវបានរាយការណ៍ថា កំពុង​បាត់ខ្លួន។

បន្ទាប់ពីមាន​រញ្ជួយដីកម្រិត ៧,២ និង ៧,៥រ៉ិចទ័រ ដែលបានវាយប្រហារជាបន្តបន្ទាប់គ្នាយ៉ាងរហ័ស កាលពី​ល្ងាចថ្ងៃពុធ រដ្ឋមន្ត្រីក្រសួងសុខាភិបាលវ៉េណេស៊ុយអេឡា លោក Carlos Alvarado បានប្រាប់ប្រព័ន្ធផ្សព្វផ្សាយរដ្ឋនៅ​ថ្ងៃសុក្រថា មនុស្សយ៉ាងហោចណាស់ ៤.៣០០នាក់ បានរងរបួស ហើយចំនួនអ្នកស្លាប់ត្រូវបានគេរំពឹងថា នឹងកើនឡើងដោយសារតែមាន​អ្នកបាត់ខ្លួនច្រើនណាស់​។

ក្រុមគ្រួសារបានបង្ហោះរូប​មនុស្សជាទីស្រឡាញ់របស់ពួកគេ តាមប្រព័ន្ធ​អ៊ីនធឺណិត ដែលមិនត្រូវបានដឹង​ដំណឹង​ ចាប់តាំងពីមាន​រញ្ជួយដីមក។ គិតត្រឹមព្រឹកថ្ងៃសុក្រនេះ​ មនុស្ស ៥៧.២៨៧នាក់ ត្រូវបានរាយការណ៍ថា បាត់ខ្លួន ហើយនៅតែមិនមានការទាក់ទងនៅឡើយទេ ពីមនុស្សចំនួន​ ៤៩.៥១៩នាក់ ក្នុងចំណោម​អ្នក​បាត់ខ្លួន​ទាំង​នោះ​។

សារព័ត៌មាន The Associated Press (AP) បាន​រាយការណ៍ថា ខិត្តប័ណ្ណផ្សព្វផ្សាយ អំពីអ្នកបាត់ខ្លួនដែលមានរូបថតនៃ​មនុស្សជាទីស្រឡាញ់ ត្រូវបានចែកនៅតាមដងផ្លូវ ខណៈពេលដែលអ្នកផ្សេងទៀតបានចែករំលែកបញ្ជីឈ្មោះដែលសរសេរដោយដៃនៅពេលពួកគេដើរ​ស្វែងរក។ ក្រុមអ្នកជួយសង្គ្រោះកំពុងស្វែងរកអ្នកនៅរស់រានមានជីវិតនៅក្នុងអគារដែលដួលរលំ នៅក្នុងទីក្រុងការ៉ាកាស និងរដ្ឋ La Guaira ជាកន្លែងដែលសំឡេងស្រែកសុំជំនួយអាចត្រូវ​បាន​ឮពីក្រោមគំនរបាក់​បែក​។

ទូរទស្សន៍រដ្ឋវ៉េណេស៊ុយអេឡាបានបង្ហាញរូបភាពនៃការជួយសង្គ្រោះ ក្នុង​នោះ​រួមទាំងរូប​ភាព​នៃ​ស្ត្រីម្នាក់ជាប់នៅក្រោមជញ្ជាំង​ស៊ីម៉ង់ត៍ ដែលត្រូវបាននាំចេញមកនៅ​មានជីវិត​៕