ដោយមាន​កំហឹងចំពោះការវាយប្រហារដោយយានដ្រូន​របស់អ៊ុយក្រែន និងខឹងសម្បា ចំពោះអ្វីដែលពួកគេមើលឃើញថា ជាការសន្យាបរាជ័យរបស់សហរដ្ឋអាមេរិក ក្នុងការសម្របសម្រួលបញ្ចប់សង្គ្រាម ដោយលក្ខខណ្ឌអំណោយផល ក្រុម​ប្រកាន់រឹង​ត្អឹង​របស់​រុស្ស៊ី កំពុងជំរុញឱ្យប្រធានាធិបតី Vladimir Putin បោះបង់ចោលការទូត និងបង្កើនសង្គ្រាមឱ្យ​ខ្លាំងក្លា​​។

ការអំពាវនាវឱ្យមានវិធានការកាន់​តែតឹងរ៉ឹងនេះ មិនមែនជារឿងថ្មីឡើយ​។ សំឡេងជាតិនិយមបានជំរុញជាយូរមកហើយ ឱ្យ​មាន​ការចល័តពេញលេញ ការបំផ្លាញទីស្នាក់ការរដ្ឋាភិបាលរបស់ទីក្រុងគីវ ការធ្វើឃាតលោក​ប្រធានាធិបតី Volodymyr Zelenskyy និងការវាយប្រហារលើរោងចក្រយានដ្រូនបស់អឺរ៉ុប។ ក្រុម​ចូល​ចិត្ត​ធ្វើ​សង្គ្រាម​ខ្លះ ថែមទាំងបានអំពាវនាវឱ្យប្រមុខវិមានក្រឹមឡាំងពិចារណាប្រើប្រាស់អាវុធនុយក្លេអ៊ែរយុទ្ធសាស្ត្រទៀតផង​។

ប៉ុន្តែការវាយប្រហារចូល​កាន់​តែ​ជ្រៅរបស់អ៊ុយក្រែន ក្នុងខែនេះ ដែលផ្តោតលើទីក្រុងមូស្គូ St Petersburg និងតំបន់គ្រីមៀ (Crimea) ក៏ដូចជាអ្វីដែលរុស្ស៊ីបាននិយាយថា ជាការវាយប្រហារដ៏សាហាវ ២លើក លើរថយន្ត​ក្រុងដឹកអ្នកដំណើរ បានធ្វើឱ្យការទាមទារទាំងនោះកាន់តែខ្លាំងក្លាឡើងៗជាង​មុន​។

អ្នកវិភាគលើក​ឡើងថា វោហាសាស្ត្រកាន់តែខ្លាំងឡើងៗនេះ​ ឆ្លុះបញ្ចាំងពីភាពមិនស្រួលកាន់តែខ្លាំងឡើងលើវិសាលភាព និងផលប៉ះពាល់នៃការវាយប្រហារដោយយានដ្រូន​របស់អ៊ុយក្រែន និងការជជែកវែកញែកកាន់តែទូលំទូលាយ អំពីរបៀបដែលរុស្ស៊ី អាចការពារខ្លួន ខណៈពេលដែលនៅតែបន្តគោលបំណងសង្គ្រាម នៅក្នុងជម្លោះដែលខ្លួនបានចាប់ផ្តើមកាល​ពី​ឆ្នាំ២០២២៕