សហព័ន្ធអន្តរជាតិនៃសមាគមកាកបាទក្រហម និងអឌ្ឍចន្ទក្រហម (IFRC) នៅថ្ងៃសុក្រ (ទី២៦ ខែមិថុនា ឆ្នាំ២០២៦) នេះ បានបើកការអំពាវនាវបន្ទាន់មួយ ដើម្បីគាំទ្រដល់កិច្ចប្រឹងប្រែងសង្គ្រោះ នៅវ៉េណេស៊ុយអេឡា បន្ទាប់ពីរញ្ជួយដីដ៏ខ្លាំងក្លា ២លើកបន្ត​គ្នា បានបំផ្លិចបំផ្លាញផ្នែកខ្លះនៃប្រទេសនេះ​។

ការអំពាវនាវនេះមានគោលបំណងរៃអង្គាសប្រាក់ចំនួន ៥០លានហ្វ្រង់ស្វីស (៦១,៨លានដុល្លារ) ដើម្បីជួយមនុស្ស ៣០០.០០០នាក់ ដោយកិច្ចប្រឹង​ប្រែងសង្គ្រោះដំបូងផ្តោតលើតំបន់ដែលរងគ្រោះខ្លាំងបំផុតនៃរដ្ឋ​ La Guaira និងតំបន់​ Greater Caracas។

យោងតាមអាជ្ញាធរវ៉េណេស៊ុយអេឡា យ៉ាងហោចណាស់មនុស្ស ២៣៥នាក់ បានបាត់បង់ជីវិត ហើយ​ ៤.៣០០នាក់បានរងរបួស បន្ទាប់ពីមាន​រញ្ជួយដីកាលពីថ្ងៃពុធ។

លោក Jagan Chapagain អគ្គលេខាធិការ IFRC បានលើក​ឡើង​នៅក្នុងសេចក្តីថ្លែងការណ៍មួយថា៖ «រញ្ជួយដីទាំងនេះ បានផ្ដល់​ការ​បំផ្លិចបំផ្លាញយ៉ាងធំធេង​ដល់ប្រជាជនវេណេស៊ុយអេឡា។ ជីវិតរាប់ម៉ឺននាក់បានផ្លាស់ប្តូរជារៀងរហូត​»។

កាកបាទក្រហមវ៉េណេស៊ុយអេឡា បាននិងកំពុងអនុវត្តប្រតិបត្តិការស្វែងរក និងជួយសង្គ្រោះ ជំនួយដំបូង ការគាំទ្រផ្លូវចិត្ត សេវាបង្រួបបង្រួមគ្រួសារ និងការវាយតម្លៃពី​ការខូចខាត ចាប់តាំងពីការរញ្ជួយដីបានកើតឡើង ទោះបីជាអ្នកស្ម័គ្រចិត្តជាច្រើនរបស់ខ្លួនរងផលប៉ះពាល់ក៏ដោយ។

លោក Chapagain បានបន្តថា៖ «ក្រុម IFRC និងកាកបាទក្រហមវ៉េណេស៊ុយអេឡាបានឆ្លើយតបភ្លាម​ៗ។ តម្លៃនៃការមានក្រុមក្នុងស្រុកជាអចិន្ត្រៃយ៍ បានបង្ហាញ​ឲ្យ​ឃើញ​យ៉ាង​ច្បាស់​លាស់​រួចទៅហើយ»។ ដោយ​បានអំពាវនាវដល់សហគមន៍អន្តរជាតិឲ្យ​គាំទ្រការអំពាវនាវនេះ លោកបាន​និយាយ​ថា៖ «គ្រោះមហន្តរាយទ្រង់ទ្រាយធំបែបនេះ មិនអាចពឹងលើ​ក្រុម​ក្នុង​ស្រុក​តែ​ឯងបានទេ»៕