អាជ្ញាធររបស់​សហភាព​មីយ៉ាន់ម៉ា នៅថ្ងៃសុក្រ (ទី២៦ ខែមិថុនា ឆ្នាំ​២០២៦) នេះ បានដុតបំផ្លាញគ្រឿងញៀនដែលរឹបអូសបានមានតម្លៃប្រមាណ ៥២៥លានដុល្លារ។​ នេះបើយោងតាមការ​ឲ្យ​ដឹង​ពី​រដ្ឋមន្ត្រីក្រសួងមហាផ្ទៃ ដែលបានស្តីបន្ទោសក្រុមឧទ្ទាមថា បាន​ជួញដូរគ្រឿងញៀនខុសច្បាប់ដែលកំពុងកើនឡើងនៅក្នុងប្រទេសដែលត្រូវបាន​បំផ្លិចបំផ្លាញដោយសង្គ្រាមមួយ​នេះ​។

អ្នកវិភាគលើក​ឡើង​ថា ការគ្រប់គ្រងដែលកំពុង​តែ​អាក្រក់​ទៅៗ​ ចាប់តាំងពីរដ្ឋប្រហារយោធាក្នុងឆ្នាំ២០២១ បានបង្កឲ្យ​មានសង្គ្រាមស៊ីវិល បានបើក​ចន្លោះ​ឲ្យ​គ្រប់ភាគីទាំងអស់ទទួលបានប្រាក់ចំណេញពីការជួញដូរគ្រឿងញៀនខុសច្បាប់។

មីយ៉ាន់ម៉ាបានលេចឡើង​ក្នុង​នាម​ជាប្រទេសផលិតអាភៀនធំជាងគេបំផុតរបស់ពិភពលោក បន្ទាប់ពីរដ្ឋាភិបាលតាលីបង់បានឡើងកាន់អំណាចវិញនៅក្នុងប្រទេសអាហ្វហ្គានីស្ថានក្នុងឆ្នាំ២០២១ ហើយ​បានបង្ក្រាបគ្រឿងញៀនប្រភេទនេះ។ យោងតាមការិយាល័យអង្គការសហប្រជាជាតិ (UN) ស្តីពីគ្រឿងញៀន និងឧក្រិដ្ឋកម្ម បាន​ឲ្យ​ដឹង​ថា បច្ចុប្បន្ននេះ ប្រទេស​នេះ​ក៏ជាប្រភពជាតិដ៏ធំបំផុតរបស់តំបន់​អាស៊ីអាគ្នេយ៍នៃសារធាតុញៀន​មេតំហ្វេតាមីនផងដែរ។

នៅក្នុងបរិវេណតំបន់ឧស្សាហកម្មមួយ នៅជាយក្រុង Yangon មន្ត្រីបានរាប់ថយក្រោយ ៣វិនាទី មុនពេលចាក់សាំងដុតគ្រឿងញៀនរយៈពេល ៣០នាទី។ បន្ទាប់មកក្រុមពន្លត់អគ្គិភ័យបានពន្លត់អណ្តាតភ្លើង។

មន្ត្រីនគរបាលប្រឆាំងគ្រឿងញៀន លោក Aung Myat Soe បានប្រាប់អ្នកសារព័ត៌មានថា៖ «ថ្នាំញៀនប្រភេទទឹកកក ដែលត្រូវបានគេស្គាល់ផងដែរថា ជាថ្នាំញៀនប្រភេទមេតំហ្វេតាមីន គឺជាថ្នាំញៀនដែលមានបរិមាណច្រើនបំផុត ក្នុងចំណោមថ្នាំញៀនដែលត្រូវបានរឹបអូស។ វាមានទម្ងន់ជាង ២៨​តោន»៕