រញ្ជួយដី​ដ៏ខ្លាំងមួយកម្រិត ៦,៥រ៉ិចទ័រ បានវាយប្រហារ​​ម្ដុំ​​កោះ Mindanao នៅ​ភាគខាងត្បូងនៃ​ប្រទេស​ហ្វីលីពីន នាថ្ងៃសុក្រ (ទី២៦ ខែមិថុនា ឆ្នាំ២០២៦) នេះ​។

ហើយ​បើយោង​តាម​ទីភ្នាក់ងារស្ទាបស្ទង់ភូគព្ភសាស្ត្រសហរដ្ឋអាមេរិក (USGS) បាន​ឲ្យ​ដឹង​ថា ការ​រញ្ជួយនេះបានកើតឡើង​​នៅជិតតំបន់​ Sarangani ខេត្ត Davao Occidental ក្នុងជម្រៅ ៥២,៤គីឡូម៉ែត្រ នៅម៉ោង ៧:៣៤យប់ ម៉ោងក្នុងស្រុក (ត្រូវ​នឹង​ម៉ោង​ ១១:៣៤ ម៉ោងសកល)។ មិនមានរបាយការណ៍ភ្លាមៗ អំពីអ្នកស្លាប់ និងរបួស ឬការខូចខាតនោះឡើយ​។

កាល​ពី​ថ្ងៃទី៨ ខែមិថុនា រញ្ជួយដីកម្រិត ៧,៨រ៉ិចទ័រ បានវាយប្រហារឆ្នេរសមុទ្រខេត្ត​ Sarangani របស់កោះ Mindanao ដែលបង្កឱ្យមានការបំផ្លិចបំផ្លាញយ៉ាងទូលំទូលាយ នៅក្នុងតំបន់លំនៅឋាន​ និងហេដ្ឋារចនាសម្ព័ន្ធសាធារណៈ។ គ្រោះ​រញ្ជួយដី​នោះ បានសម្លាប់មនុស្សយ៉ាងហោចណាស់ ៧៨នាក់ និងប៉ះពាល់ដល់មនុស្សប្រហែល ១,៥លាននាក់។

ហ្វីលីពីន គឺជាប្រទេសមួយក្នុងចំណោមប្រទេសដែលងាយ​មាន​មហន្ត​រាយបំផុត នៅលើពិភពលោក ដោយសារតែទីតាំងរបស់ប្រទេស​នេះស្ថិត​តាមបណ្តោយកង​ភ្លើងប៉ាស៊ីហ្វិក ជាតំបន់ដែលត្រូវបានគេស្គាល់ថា មានរញ្ជួយដី និងសកម្មភាពភ្នំភ្លើងញឹកញាប់៕