ប្រទេសអ៊ីស្រាអែល និងលីបង់ បានចុះហត្ថលេខាលើកិច្ចព្រមព្រៀងក្របខ័ណ្ឌមួយនៅទីក្រុងវ៉ាស៊ីនតោន កាលពីថ្ងៃសុក្រ ទី២៦ ខែមិថុនា បន្ទាប់ពីការចរចាជាច្រើនថ្ងៃដើម្បីទទួលបានការបញ្ចប់ការប្រយុទ្ធគ្នារវាងអ៊ីស្រាអែលនិងក្រុមសកម្មប្រយុទ្ធហេសបូឡាគាំទ្រដោយអ៊ីរ៉ង់។ ឯកអគ្គរដ្ឋទូតលីបង់ លោកស្រី Nada Moawad និងសមភាគីអ៊ីស្រាអែល លោក Yechiel Leiter បានចុះហត្ថលេខាលើឯកសារត្រីភាគីជាមួយសហរដ្ឋអាមេរិកនៅក្រសួងការបរទេសក្នុងទីក្រុងវ៉ាស៊ីនតោន។

រដ្ឋមន្ត្រីការបរទេសអាមេរិក លោក Marco Rubio បានថ្លែងមុនពេលចុះហត្ថលេខាលើកិច្ចព្រមព្រៀងថា «ថ្ងៃនេះ យើងបានបោះជំហានដំបូង ជាអ្វីដែលនឹងក្លាយជាដំណើរដ៏លំបាក ប៉ុន្តែជាដំណើរដ៏សំខាន់ និងចាំបាច់» ។ ជម្លោះរវាងអ៊ីស្រាអែល និងក្រុមហេសបូឡា បានផ្ទុះឡើងនៅពេលដែលក្រុមប្រដាប់អាវុធបានបាញ់ទៅលើអ៊ីស្រាអែលកាលពីថ្ងៃទី២ ខែមីនា ប៉ុន្មានថ្ងៃបន្ទាប់ពីសហរដ្ឋអាមេរិក និងអ៊ីស្រាអែល បានវាយប្រហារលើអ៊ីរ៉ង់។ ការវាយប្រហាររបស់ក្រុមហេសបូឡា បានបង្កឱ្យមានការវាយប្រហារតាមអាកាស និងដីគោករបស់អ៊ីស្រាអែល ដែលបានសម្លាប់មនុស្សជាង៤.០០០នាក់នៅក្នុងប្រទេសលីបង់ និងបានធ្វើឱ្យមនុស្សជាងមួយលាននាក់ភៀសខ្លួន។ ក្រុមមន្ត្រី មិនបានផ្តល់ព័ត៌មានលម្អិតអំពីកិច្ចព្រមព្រៀងក្របខ័ណ្ឌនេះទេ ហើយក៏មិនបាននិយាយថាលក្ខខណ្ឌនឹងខុសគ្នាយ៉ាងណាពីលក្ខខណ្ឌដែលបានរួមបញ្ចូលនៅក្នុងកិច្ចព្រមព្រៀងបទឈប់បាញ់នៅថ្ងៃទី១៦ ខែមេសា ដែលបានធ្វើឡើងមុនកិច្ចចរចាអ៊ីស្រាអែល-លីបង់ជាច្រើនជុំសម្របសម្រួលដោយសហរដ្ឋអាមេរិក។ លោកស្រី Moawad បាននិយាយថា «ក្របខ័ណ្ឌត្រីភាគីដែលយើងបានចុះហត្ថលេខានៅថ្ងៃនេះ គឺជាជំហានដំបូងនៅលើផ្លូវឆ្ពោះទៅរកការស្តារឡើងវិញអធិបតេយ្យភាព និងបូរណភាពទឹកដីរបស់ប្រទេសលីបង់ ដោយធានាបាននូវការបញ្ឈប់អរិភាពជាអចិន្ត្រៃយ៍ និងចុងក្រោយ ដែលអនុញ្ញាតឱ្យប្រជាជនរបស់យើងត្រឡប់ទៅទឹកដីរបស់ពួកគេវិញ និងអនុញ្ញាតឱ្យប្រជាជនលីបង់ទាំងអស់រស់នៅក្នុងសន្តិភាព សន្តិសុខ និងវិបុលភាព»។