ប្រទេសគុយបា បានធ្វើសមយុទ្ធយោធានៅទូទាំងតំបន់ភាគកណ្តាល និងភាគខាងលិចរបស់ប្រទេស កាលពីថ្ងៃសុក្រ ទី២៦ ខែមិថុនា ជាផ្នែកមួយនៃសកម្មភាពការពារជាតិប្រចាំសប្តាហ៍របស់ខ្លួន ដោយមានទាំងមន្ត្រីកងទ័ព និងជនស៊ីវិលចូលរួម នេះបើយោងតាមទូរទស្សន៍រដ្ឋគុយបា។

នៅក្នុងខេត្ត Villa Clara ភាគកណ្តាល មានចម្ងាយប្រហែល៣០០គីឡូម៉ែត្រភាគខាងកើតទីក្រុង ឡាហាវ៉ាន មន្ត្រីកងទ័ពបានធ្វើសមយុទ្ធតាកទិកនៅមជ្ឈមណ្ឌលសិក្សាកងទ័ពកណ្តាល រួមទាំងសមយុទ្ធបាញ់កាំភ្លើងធំ សមយុទ្ធបាញ់គ្រាប់ពិត និងសមយុទ្ធនៅសមរភូមិ។

នៅក្នុងខេត្ត Pinar del Rio ជាខេត្តមួយចម្ងាយប្រហែល២០០គីឡូម៉ែត្រភាគខាងលិចរដ្ឋធានី អ្នកចូលរួមជាជនស៊ីវិលបានហ្វឹកហាត់គប់គ្រាប់បែកដៃ ដាក់គ្រាប់មីន បាញ់កាំភ្លើង ការជម្លៀស និងនីតិវិធីសង្គ្រោះបឋម។

អាជ្ញាធរប្រទេសគុយបា បានធ្វើសមយុទ្ធស្រដៀងគ្នានេះរៀងរាល់សប្តាហ៍រយៈពេលជាច្រើនខែមកហើយ ដោយលើកឡើងពីអ្វីដែលពួកគេពិពណ៌នាថាមានការគំរាមកំហែងជាបន្តបន្ទាប់នៃសកម្មភាពយោធារបស់សហរដ្ឋអាមេរិកប្រឆាំងប្រទេសកោះមួយនេះ។

ក្រោមការដឹកនាំរបស់ប្រធានាធិបតី លោក Donald Trump សហរដ្ឋអាមេរិក បានដាក់ការបិទផ្លូវលើប្រទេសគុយបាដោយជោគជ័យ ដោយគំរាមដាក់ទណ្ឌកម្មប្រឆាំងប្រទេសនានាដែលផ្គត់ផ្គង់ប្រេងឥន្ធនៈដល់ប្រទេសនេះ ដែលបានបណ្តាលឱ្យប្រទេសគុយបាដាច់ចរន្តអគ្គិសនី និងធ្វើឱ្យមានវិបត្តិអាក្រក់បំផុតក្នុងរយៈពេលជាច្រើនទសវត្សរ៍មកនេះ។