ប្រទេសជប៉ុននៅតែស្ថិតក្នុងការប្រុងប្រយ័ត្នខ្ពស់ នៅថ្ងៃសៅរ៍ (ទី២៧ ខែមិថុនា ឆ្នាំ២០២៦) នេះ​ ខណៈដែលព្យុះទីហ្វុង Mekkhala បានបក់​បោក​ជិតដល់​ឆ្នេរសមុទ្រភាគខាងកើត បន្ទាប់ពីព្យុះទីហ្វុង Higos បានចុះខ្សោយទៅជាសម្ពាធត្រូពិច ដោយអាជ្ញាធរបានព្រមានអំពីការមាន​ភ្លៀងធ្លាក់ខ្លាំង ទឹកជំនន់ និងបំណាក់​ដី។​ នេះបើយោងតាមសេចក្ដី​រាយការណ៍​របស់​ប្រព័ន្ធផ្សព្វផ្សាយ។

សារព័ត៌មាន Kyodo News បាន​រាយការណ៍ថា ទីភ្នាក់ងារឧតុនិយមជប៉ុន បានឲ្យ​ដឹង​ថា ព្យុះ Higos បានបោកបក់កាត់តំបន់ជិតទីក្រុងតូក្យូមុនពេលថម​ថយ​កម្លាំង​ ខណៈដែលព្យុះដ៏ខ្លាំងក្លា Mekkhala កំពុងធ្វើដំណើរទៅភាគឦសាន តាមបណ្តោយឆ្នេរសមុទ្រប៉ាស៊ីហ្វិក ហើយអាចបោកបក់ដល់​ដី​គោក នៅថ្ងៃសៅរ៍នេះ​។

ទីភ្នាក់ងារនេះព្យាករពី​កម្រិត​ទឹក​ភ្លៀងរហូតដល់ ២៥០មីលីម៉ែត្រ នៅក្នុងតំបន់ Tokai និង ២០០មីលីម៉ែត្រ នៅក្នុងតំបន់ Kanto-Koshin រួមទាំងទីក្រុងតូក្យូផងដែរ នៅ​ព្រឹក​ថ្ងៃអាទិត្យ។ អាកាសធាតុអាក្រក់ធ្ងន់ធ្ងរនេះ កើតឡើងបន្ទាប់ពីមាន​ភ្លៀងធ្លាក់ខ្លាំងជាច្រើនថ្ងៃដែលបណ្តាលមកពីព្យុះទីហ្វុងទាំង២ និងភ្លៀងធ្លាក់តាមរដូវ។

នៅក្នុងខេត្ត Yamaguchi មនុស្សម្នាក់ត្រូវបានរាយការណ៍ថា បាត់ខ្លួន និងមនុស្សជាច្រើននាក់ទៀតរងរបួស បន្ទាប់ពីបំណាក់​ដីបានបំផ្លាញផ្ទះ ១ខ្នង កាលពីថ្ងៃសុក្រ។ មនុស្សជាង ២លាននាក់នៅទូទាំងខេត្តចំនួន ១៣ នៅភាគខាងលិចជប៉ុន ត្រូវបានដាក់ឱ្យស្ថិតក្រោមបញ្ជាជម្លៀស កាលពី​ថ្ងៃសុក្រ ខណៈដែលអាជ្ញាធរបានព្រមានអំពីស្ថានភាពកាន់តែអាក្រក់ទៅៗ។

ការព្រមានសុវត្ថិភាពបន្ទាន់កម្រិត៥ ដែលជាកម្រិតខ្ពស់បំផុតរបស់ជប៉ុន ត្រូវបានចេញសម្រាប់ផ្នែកខ្លះនៃ តំបន់​ Seika ក្នុងខេត្ត Kyoto បន្ទាប់ពីមាន​បំណាក់​ដីមួយផ្សេងទៀត។ ហើយ​អាជ្ញាធរបានជំរុញឱ្យប្រជាពលរដ្ឋមានការប្រុងប្រយ័ត្នខ្ពស់ ខណៈដែលហានិភ័យនៃ​ទឹកជំនន់ និងបំណាក់​ដីបន្ថែមទៀត នៅតែបន្ត​មាន​៕