ទីភ្នាក់ងារសារព័ត៌មានរដ្ឋ Xinhua បាន​រាយការណ៍​នៅ​ថ្ងៃសៅរ៍ (ទី២៧ ខែមិថុនា ឆ្នាំ២០២៦) នេះ​ថា ជនជាតិចិនយ៉ាងហោចណាស់ ៧នាក់ បានបាត់បង់ជីវិត​នៅក្នុងហេតុការណ៍រញ្ជួយដីដ៏ខ្លាំងក្លាដែលបានវាយប្រហារប្រទេសវ៉េណេស៊ុយអេឡាកាលពី​ដើមសប្តាហ៍នេះ​។

ស្ថានទូតចិនប្រចាំប្រទេសវ៉េណេស៊ុយអេឡា បានឲ្យ​ដឹង​ថា ខ្លួនកំពុងបន្តសម្របសម្រួលជាមួយអាជ្ញាធរមូលដ្ឋាន និងផ្តល់ជំនួយ បន្ទាប់ពីកើត​គ្រោះមហន្តរាយនេះ ដែលបណ្តាលឱ្យមានអ្នកស្លាប់ និងរបួសយ៉ាង​ច្រើន​។

អ្នកនាំពាក្យក្រសួងការបរទេស លោក Guo Jiakun បាននិយាយថា ទីក្រុងប៉េកាំងនឹងបញ្ជូនជំនួយមនុស្សធម៌បន្ទាន់ និងក្រុមជួយសង្គ្រោះ ដើម្បីគាំទ្រដល់កិច្ចខិតខំប្រឹងប្រែងសង្គ្រោះ នៅវ៉េណេស៊ុយអេឡា។

លោក Guo បានប្រាប់អ្នកសារព័ត៌មាននៅទីក្រុងប៉េកាំងថា៖ «រដ្ឋាភិបាលចិន និងសមាគមកាកបាទក្រហមចិន នឹងផ្តល់ជំនួយមនុស្សធម៌បន្ទាន់ដល់ប្រទេសវ៉េណេស៊ុយអេឡារៀងៗខ្លួន»។ ជាមួយ​គ្នានេះ លោកបានបន្ថែមថា ប្រទេសចិនក៏នឹងបញ្ជូនផង​ដែរ​នូវ​ក្រុមជួយសង្គ្រោះ ដើម្បីជួយក្នុងប្រតិបត្តិការស្វែងរក និងជួយសង្គ្រោះ និងជំនួយផ្នែកវេជ្ជសាស្រ្ត។

គួរបញ្ជាក់​ថា ប្រធានាធិបតីស្តីទី លោកស្រី​ Delcy Rodriguez បានបញ្ជាក់​កាលពីថ្ងៃសុក្រថា ចំនួនអ្នកស្លាប់ដោយសារគ្រោះរញ្ជួយដីដ៏ខ្លាំង ២លើកដែលបានវាយប្រហារប្រទេសវ៉េណេស៊ុយអេឡា កាលពីថ្ងៃពុធ បានកើនឡើងដល់យ៉ាង​តិច ៩២០នាក់ ខណៈដែលចំនួនអ្នករងរបួស បានកើនឡើងដល់ ៣.៣៦០​នាក់៕