នៅ​ថ្ងៃសៅរ៍ (ទី២៧ ខែមិថុនា ឆ្នាំ២០២៦) នេះ ដោយដកស្រង់សម្តីពី​អាជ្ញាធរសុខាភិបាល ប្រព័ន្ធផ្សព្វផ្សាយ បាន​រាយការណ៍ថា ប្រទេសស្រីលង្កាកំពុងប្រឈមនឹងការរាតត្បាតនៃជំងឺគ្រុនឈាម បន្ទាប់ពីការឆ្លងដែលត្រូវបានបញ្ជាក់ គឹ​លើសពី ៥០.០០០ករណីហើយ​ ក្នុងឆ្នាំ២០២៦ ដោយមានអ្នកស្លាប់ចំនួន ២៩នាក់។

លោក Kapila Kannangara នាយកស្តីទីនៃអង្គភាពគ្រប់គ្រងជំងឺគ្រុនឈាមជាតិ (National Dengue Control Unit) បាននិយាយថា ប្រទេសនេះកំពុងកត់ត្រាករណីថ្មី ចន្លោះពី ៦០០ ទៅ ៧០០ករណីជារៀងរាល់ថ្ងៃ ដែល​កម្រិត​​នេះ​ត្រូវបាន​ជំរុញដោយអាកាសធាតុអំណោយផល ការកកើត​សត្វ​មូសកាន់តែច្រើន​ និងការចូលរួមមិនគ្រប់គ្រាន់ពីសាធារណជន ក្នុងកិច្ចប្រឹងប្រែងបង្ការ។ នេះបើយោងតាមសារព័ត៌មាន Daily Mirror។

មន្ត្រីសុខាភិបាលបានធ្វើយុទ្ធនាការគ្រប់គ្រងជំងឺគ្រុនឈាមពិសេស នៅក្នុងតំបន់ដែលមានហានិភ័យខ្ពស់ចំនួន ៦០០កន្លែង​ ដែលត្រូវបានកំណត់ថា ជាតំបន់​ខ្លាំង​ក្នុងអំឡុងពេលមាន​ខ្យល់មូសុងនិរតី។ ប្រតិបត្តិការនេះផ្តោតលើការលុបបំបាត់កន្លែងកកើត​សត្វ​មូស តាមរយៈការជំរុញការសម្អាតសហគមន៍ និងកម្មវិធីយល់ដឹងជាសាធារណៈដែលពាក់ព័ន្ធនឹងសាលារៀន អាជ្ញាធរមូលដ្ឋាន និងភ្នាក់ងាររដ្ឋាភិបាល។

គួរបញ្ជាក់ថា ប្រទេសស្រីលង្កាបានជួបប្រទះនឹងការផ្ទុះឡើងនៃជំងឺគ្រុនឈាមធំៗជាច្រើនដង ក្នុងរយៈពេលប៉ុន្មានឆ្នាំចុងក្រោយនេះ ក្នុង​នោះ​រួមទាំងការផ្ទុះឡើងដ៏អាក្រក់បំផុត នៅ​ឆ្នាំ២០១៧ នៅពេលដែលមានករណីឆ្លងជាង ១៨៦.០០០ករណី និងការស្លាប់ចំនួន ៤៤០នាក់ត្រូវបានកត់ត្រាទុក៕