ប្រធានាធិបតីអាមេរិក លោក Donald Trump កាលពី​ថ្ងៃសុក្រ (ទី២៦ ខែមិថុនា ឆ្នាំ២០២៦) បានបង្ហាញរូបភាពលិខិតឆ្លងដែនអាមេរិកថ្មីដែលចេញ​ដោយ​មានកំណត់ ក្នុង​ឱកាស​ពិសេស ដើម្បីអបអរសាទរខួបលើកទី២៥០​ នៃឯករាជ្យរបស់ប្រទេស ដោយបង្ហាញរូបភាព​ដែល​មាន​ទឹក​មុខ​ម៉ឺងម៉ាត់របស់លោក​។

តាម​រយៈ​ការបង្ហោះមួយ នៅលើវេទិកាបណ្ដាញសង្គម Truth Social របស់លោក ដែលមានគំរូលិខិតឆ្លងដែន លោក Trump បានសរសេរថា «លិខិតឆ្លងដែនថ្មីរបស់សហរដ្ឋអាមេរិក ដែលសរសេរថា សូមស្វាគមន៍ ប៉ុន្តែសូមប្រព្រឹត្ត​ដោយសមរម្យ​!»។

រូបភាពនេះបង្ហាញ​ពី​លោក Trump ដែល​មាន​​ទឹកមុខមាំ​​ យក​ដៃ​ទប់​​​ទៅ​តុធ្វើការ​របស់លោក​ និងហត្ថលេខារបស់លោក​ ដោយមាន​អត្ថបទនៃសេចក្តីប្រកាសឯករាជ្យនៅផ្ទៃខាងក្រោយ។ វាហាក់ដូចជាយក​តាម​គំរូរូបពាក់​កណ្ដាលខ្លួន​ដែលថតដោយលោក Daniel Torok ជា​អ្នកថតរូបរបស់​សេតវិមាន។

ទំព័រម្ខាងទៀតបង្ហាញគំនូរដែលពណ៌នាអំពីការចុះហត្ថលេខាលើសេចក្តីប្រកាសនៅឆ្នាំ១៧៧៦ ជាមួយនឹងពាក្យថា «United States of America 250» (សហរដ្ឋអាមេរិក​ ២៥០ឆ្នាំ)។ សេតវិមានបានបង្ហោះរូបភាពលិខិតឆ្លងដែនដូចគ្នា ជាមួយនឹងពាក្យថា «PATRIOT PASSPORT» (លិខិតឆ្លងដែន​អ្នកស្នេហាជាតិ)​។

ក្រសួងការបរទេស ដែលបានប្រកាសពីមុនថា លិខិតឆ្លងដែនរំលឹកដែលមាន «ស្នាដៃសិល្បៈពិសេស​» នឹងមានចាប់ពីថ្ងៃទី៦ ខែកក្កដានោះ​ មិនបានឆ្លើយតបភ្លាមៗឡើយ​ ចំពោះសំណើសុំការអត្ថាធិប្បាយ។ កាលពីខែមេសា មន្ត្រីក្រសួងម្នាក់ បាននិយាយថា លិខិតឆ្លងដែនដែលមាន​ពាក់ព័ន្ធ​នឹង​លោក Trump នឹងមានសម្រាប់តែការណាត់ជួបផ្ទាល់ នៅទីក្រុងវ៉ាស៊ីនតោន «ដរាបណានៅមាន»។

លោក Trump នឹងក្លាយជាប្រធានាធិបតីអាមេរិកកំពុងកាន់តំណែងដំបូងគេ ដែលមាននៅក្នុងឯកសារធ្វើដំណើររបស់ជនជាតិអាមេរិក៕