ប៉ាគីស្ថាន និងអ៊ីរ៉ង់ កាលពីថ្ងៃសុក្រ (ទី២៦ ខែមិថុនា ឆ្នាំ២០២៦) បានអះអាងជាថ្មីនូវការប្តេជ្ញាចិត្ត ក្នុងការលើកកម្ពស់សន្តិភាព និងស្ថិរភាពយូរអង្វែង នៅក្នុងតំបន់ ក្នុងអំឡុងពេលមាន​ការ​សន្ទនា​តាម​ទូរស័ព្ទ រវាងអ្នកការទូតជាន់ខ្ពស់​នៃប្រទេស​ទាំង២ បន្ទាប់ពីមាន​ការវាយប្រហារថ្មី ខណៈដែលកិច្ចចរចាសន្តិភាពរវាងសហរដ្ឋអាមេរិក និងអ៊ីរ៉ង់ កំពុងបន្តប្រព្រឹត្ត​ទៅ​។

យោងតាមសេចក្តីថ្លែងការណ៍របស់ក្រសួងការបរទេសប៉ាគីស្ថាន បាន​ឲ្យដឹង​ថា អំឡុង​ពេលជជែក​​ជាមួយរដ្ឋមន្ត្រីការបរទេសអ៊ីរ៉ង់ លោក Abbas Araghchi ឧបនាយករដ្ឋមន្ត្រី និងជារដ្ឋមន្ត្រីការបរទេសប៉ាគីស្ថាន លោក Mohammad Ishaq Dar បានបញ្ជាក់ជាថ្មីអំពីការប្តេជ្ញាចិត្តរបស់ប៉ាគីស្ថាន ក្នុងការដើរតួនាទីស្ថាបនា ដើម្បី​ជំរុញសន្តិភាពក្នុងតំបន់ និងអន្តរជាតិ។

 ចំណែក​លោក Araghchi បានសម្តែងការកោតសរសើរដល់​ការគាំទ្រជាបន្តបន្ទាប់របស់ប៉ាគីស្ថាន ចំពោះដំណើរការសន្តិភាព។ លោកក៏បានថ្លែងអំណរគុណដល់ទីក្រុងអ៊ីស្លាម៉ាបាដ សម្រាប់ការសម្របសម្រួលដល់ការវិលត្រឡប់របស់សមាជិកនាវិក និងអ្នកនេសាទអ៊ីរ៉ង់ ទៅកាន់ប្រទេសអ៊ីរ៉ង់វិញ ប្រកប​ដោយសុវត្ថិភាព និងរលូន។ ហើយ​ភាគីទាំង២ បានព្រមព្រៀងគ្នារក្សាទំនាក់ទំនងជិតស្និទ្ធ ខណៈដែលប្រទេសទាំង២ បន្តកិច្ចខិតខំប្រឹងប្រែងផ្នែកការទូត។

គួរបញ្ជាក់ថា ការជជែក​តាម​ទូរស័ព្ទនេះ បានកើតឡើងបន្ទាប់ពីសហរដ្ឋអាមេរិក បានឲ្យ​ដឹង​កាលពីថ្ងៃសុក្រថា កងកម្លាំងរបស់ខ្លួន បានវាយប្រហារទីតាំងមីស៊ីល យានដ្រូន និងរ៉ាដារបស់អ៊ីរ៉ង់ បន្ទាប់ពីចោទប្រកាន់ទីក្រុងតេអេរ៉ង់ថា ជាអ្នកនៅពីក្រោយការវាយប្រហារលើនាវាពាណិជ្ជកម្ម ១គ្រឿង ដែលឆ្លងកាត់ច្រកសមុទ្រ Hormuz។ ក្រោយមក កងឆ្មាំបដិវត្តន៍ឥស្លាមអ៊ីរ៉ង់ (IRGC) បានប្រាប់​ថា កងកម្លាំងជើងទឹករបស់ខ្លួន បានកំណត់គោលដៅទីតាំងយោធាអាមេរិក នៅទូទាំងតំបន់ ដើម្បីឆ្លើយតបទៅនឹងការវាយប្រហាររបស់អាមេរិក នៅភាគខាងត្បូងប្រទេស ហើយបានសន្យាឆ្លើយតបយ៉ាងម៉ឺងម៉ាត់ ប្រសិនបើស្ថានភាព​នេះ​នៅតែបន្តមាន​៕