អ្នកគាំទ្រក្រុម​ហេសបូឡា បាននាំ​គ្នា​ចេញទៅ​​តាមដងផ្លូវនៃទីក្រុងបេរូត កាល​ពី​យប់​ថ្ងៃសុក្រ (ទី២៦ ខែមិថុនា ឆ្នាំ២០២៦) ដើម្បីតវ៉ាប្រឆាំងនឹងកិច្ចព្រមព្រៀង រវាងប្រទេស​អ៊ីស្រាអែល និងលីបង់ ខណៈដែលសមាជិកសភាមួយ​រូប​មកពីក្រុមគាំទ្រដោយអ៊ីរ៉ង់មួយ​នេះ បានព្រមានថា ការអនុវត្តកិច្ចព្រមព្រៀងនេះប្រឈមឲ្យ​កើត​សង្គ្រាមស៊ីវិល។

ទីភ្នាក់ងារសារព័ត៌មានជាតិ (NNA) ដែលគ្រប់គ្រងដោយរដ្ឋ បានរាយការណ៍ថា «អ្នកគាំទ្រក្រុម​ហេសបូឡា បាននាំ​គ្នា​ជិះម៉ូតូឆ្លងកាត់ដងផ្លូវនៃទីក្រុងបេរូត» ក្នុង​នោះ​រួមមាន​ទាំងតំបន់ភាគ​កណ្តាល និងតាមបណ្តោយផ្លូវមួយ​ខ្សែទៅ​អាកាសយានដ្ឋាន «ដើម្បីតវ៉ាប្រឆាំងនឹងកិច្ចព្រមព្រៀងក្របខ័ណ្ឌដែលត្រូវបាន​បានប្រកាស រវាងលីបង់ និងអ៊ីស្រាអែល»។

អ្នកឆ្លើយឆ្លងព័ត៌មានរបស់​ទីភ្នាក់ងារសារព័ត៌មាន​ AFP បានឃើញមនុស្សជិះម៉ូតូ និងស្រែកពាក្យស្លោកតាមបណ្តោយផ្លូវមួយខ្សែ​ ក៏ដូចជានៅ​តាមប៉ុស្តិ៍ត្រួតពិនិត្យបណ្តោះអាសន្នរបស់កងទ័ពលីបង់ ដែលបង្កើតឡើងតាមបណ្តោយផ្លូវជាច្រើននៃរដ្ឋធានីនេះ​។

សមាជិកសភារបស់​ក្រុម​ហេសបូឡា លោក Hassan Fadlallah ដែលគណបក្សរបស់លោក បានបដិសេធជាយូរមកហើយ ចំពោះកិច្ចចរចាដោយផ្ទាល់ រវាងអ៊ីស្រាអែល និងលីបង់ បានបញ្ជាក់​ថា «អាជ្ញាធរលីបង់ នឹងមិនអាចអនុវត្តកិច្ចព្រមព្រៀងដែលបានចុះហត្ថលេខានៅទីក្រុងវ៉ាស៊ីនតោនបានទេ លុះត្រាតែ​ពួកគេ ដោយមានការគាំទ្រពីអាមេរិក ព្រម​ឱ្យ​មាន​សង្គ្រាមស៊ីវិល»។

វីដេអូដែលបង្ហោះ​ព្រោងព្រាត​លើប្រព័ន្ធផ្សព្វផ្សាយក្នុងស្រុក និងបណ្ដាញ​សង្គម បានបង្ហាញឱ្យ​អ្នកគាំទ្រក្រុម​ហេសបូឡារាប់រយនាក់ជិះម៉ូតូ និងម៉ូតូតូចៗ ទៅ​គ្រប់កន្លែង​នៅ​ជាយក្រុងភាគខាងត្បូងនៃទីក្រុងបេរូត ដែលជាបន្ទាយដ៏រឹង​មាំ​របស់ក្រុមនេះ​ មុនពេលពួកគេធ្វើដំណើរទៅកាន់ចំណុចកណ្តាលនៃរដ្ឋធានី៕