កូរ៉េខាងត្បូងបាន​ប្រាប់​ឲ្យដឹង​ថា ខ្លួនបានបញ្ជូនយន្តហោះចម្បាំង ជាវិធានការប្រុងប្រយ័ត្ន បន្ទាប់ពីយន្តហោះយោធាចិន និងរុស្ស៊ីជាង ១០គ្រឿង បានចូលទៅក្នុងតំបន់ការពារដែនអាកាសរបស់ខ្លួន នៅ​ថ្ងៃសៅរ៍ (ទី២៧ ខែមិថុនា ឆ្នាំ២០២៦)​ នេះ។

នាយ​សេនាធិការចម្រុះ នៅទីក្រុងសេអ៊ូល បានបញ្ជាក់​ថា យន្តហោះចិន និងរុស្ស៊ី បានចូល ហើយបន្ទាប់មកបានចាកចេញពីតំបន់កំណត់អត្តសញ្ញាណការពារដែនអាកាសកូរ៉េ (KADIZ) នៅ​លើ​សមុទ្រខាងកើត និងសមុទ្រខាងត្បូង។

នៅក្នុងសេចក្តីថ្លែងការណ៍មួយដោយមិនបានផ្តល់ព័ត៌មានលម្អិតបន្ថែម យោធាកូរ៉េខាងត្បូងបានឲ្យដឹង​ថា៖ «យោធាកូរ៉េខាងត្បូងបានរកឃើញយន្តហោះចិន និងរុស្ស៊ី មុនពេលបាន​ហោះ​ចូលទៅក្នុងតំបន់នោះ ហើយបានដាក់ពង្រាយយន្តហោះចម្បាំងរបស់កងទ័ពអាកាស ដើម្បីត្រៀមខ្លួន សម្រាប់ហេតុការណ៍យថាហេតុ​ណាមួយ»។

សេចក្ដី​ថ្លែង​ការបាន​បន្ថែមថា យន្តហោះចិន និងរុស្ស៊ី មិនបានរំលោភលើដែនអាកាសរបស់​កូរ៉េខាងត្បូងទេ។ តំបន់កំណត់អត្តសញ្ញាណការពារដែនអាកាស មិនមែនជាដែនអាកាសអធិបតេយ្យទេ ប៉ុន្តែជាតំបន់ទ្រនាប់ដែលប្រទេសនានាកំណត់អត្តសញ្ញាណយន្តហោះដែលចូល​មក​កាន់តែជិត សម្រាប់គោលបំណងសន្តិសុខ។

យន្តហោះយោធា ជាទូទៅត្រូវបានគេរំពឹងថា នឹងជូនដំណឹងដល់ប្រទេសពាក់ព័ន្ធ មុនពេលចូលទៅក្នុងតំបន់ការពារដែនអាកាសរបស់ប្រទេសនោះ​ ទោះបីជាការជូនដំណឹងបែបនេះមិនត្រូវបានតម្រូវ​ដោយច្បាប់ក៏ដោយ។ ប្រទេស​ចិន និងរុស្ស៊ីមិនបានធ្វើអត្ថាធិប្បាយភ្លាមៗឡើយ ពាក់ព័ន្ធ​នឹង​ឧប្បត្តិហេតុនេះ៕