កោះ​តៃវ៉ាន់បានចេញសេចក្តីជូនដំណឹងថ្មី អំពីភ្លៀងធ្លាក់ខ្លាំង កាលពីយប់ថ្ងៃសុក្រ (ទី២៦ ខែមិថុនា ឆ្នាំ២០២៦) បន្ទាប់ពីមានភ្លៀងធ្លាក់ខ្លាំង ដែលបានបណ្ដាល​ឱ្យ​មនុស្សយ៉ាងហោចណាស់ ២នាក់ស្លាប់​ និងបង្កឱ្យមានទឹកជំនន់គ្រប់ទីកន្លែង​ពាសពេញកោះនេះ។ នេះបើយោងតាមប្រព័ន្ធផ្សព្វផ្សាយ ក្នុងស្រុក ដោយដកស្រង់សម្តីអាជ្ញាធរអាកាសធាតុ។

គេហទំព័រព័ត៌មាន Focus Taiwan បាន​រាយការណ៍ថា រដ្ឋបាលអាកាសធាតុកណ្តាល បានចេញសេចក្តីជូនដំណឹង អំពីភ្លៀងធ្លាក់ខ្លាំង និងកាន់តែ​ខ្លាំង សម្រាប់តំបន់​ Yunlin County ជាកន្លែងដែលកម្រិត​ទឹកភ្លៀងអាចលើសពី ២០០មីលីម៉ែត្រ ក្នុងរយៈពេល ២៤ម៉ោង ឬ ១០០មីលីម៉ែត្រ ក្នុងរង្វង់​ ៣ម៉ោង។

ការព្រមានអំពីភ្លៀងធ្លាក់ខ្លាំង ក៏នៅតែមានប្រសិទ្ធភាពផង​ដែរ សម្រាប់ផ្នែកខ្លះនៃភាគកណ្តាល ភាគខាងត្បូង ភាគខាងកើត និងភាគខាងជើងកោះ​តៃវ៉ាន់ ក្នុង​នោះ​រួមមាន​ទាំងទីក្រុង Taichung, Tainan, Kaohsiung និង​ Taipei (តៃ​ប៉ិ) ដោយភ្លៀងធ្លាក់ត្រូវបានគេរំពឹងថា នឹងថម​ថយនៅថ្ងៃសៅរ៍នេះ​។

ការព្រមានទាំងនេះកើតឡើងបន្ទាប់ពីមាន​អាកាសធាតុអាក្រក់​ធ្ងន់ធ្ងរជាច្រើនថ្ងៃ ដែលបង្ក​ជា​ទឹកជំនន់គ្រប់​ទីកន្លែង​។ អាជ្ញាធរមូលដ្ឋានបានបញ្ជាក់​ថា ឧប្បត្តិហេតុទឹកជំនន់ចំនួន ៤៨៧កន្លែង​ ត្រូវបានកត់ត្រានៅទូទាំងកោះ ចាប់តាំងពីថ្ងៃព្រហស្បតិ៍ ដោយមាន​តំបន់ ៧៤ នៅតែត្រូវទឹក​ជន់លិច​ គិតត្រឹមថ្ងៃសុក្រ។

មន្ត្រី​បាន​ជំរុញ​ឲ្យ​ប្រជាពលរដ្ឋ​នៅ​តំបន់​ដែល​រង​ផល​ប៉ះពាល់​ បន្ត​ការ​ប្រុង​ប្រយ័ត្ន ខណៈ​ហានិភ័យ​មាន​​ទឹកជំនន់​គំហុក​ភ្លាមៗ បំណាក់​​ដី និង​គ្រោះថ្នាក់​ផ្សេងៗ​ទៀត ​ទាក់ទង​នឹង​អាកាសធាតុ ​នៅ​តែ​ខ្ពស់៕