អាជ្ញាធរគាំទ្រដោយវិមានក្រឹមឡាំង នៅតំបន់ដែល​ត្រូវ​បាន​បញ្ចូល​ជាដែន​ដី​ឧសម្ព័ន្ធ គឺគ្រីមៀ (Crimea) បានប្រកាសស្ថានភាពគ្រាអាសន្ន កាល​ពី​រសៀលថ្ងៃសុក្រ (ទី២៦ ខែមិថុនា ឆ្នាំ២០២៦) បន្ទាប់ពីមាន​ការវាយប្រហារយ៉ាងខ្លាំងដោយ​អ៊ុយក្រែន អស់រយៈពេលជាច្រើនថ្ងៃ ដោយ​បាននាំ​ឱ្យដាច់ចរន្តអគ្គិសនី នៅក្នុងតំបន់ខ្លះនៃឧបទ្វីបនេះ និងធ្វើឱ្យប្រជាជនជួប​បញ្ហា​ប្រឈម​កាន់តែធ្ងន់ធ្ងរឡើង ដែល​មាន​កង្វះខាតប្រេងឥន្ធនៈ និងការរឹតបន្តឹងលើការដឹកជញ្ជូនសាធារណៈ។

ក្នុងសុន្ទរកថាវីដេអូ នៅ​លើ​កម្មវិធីផ្ញើសារ Telegram ដែលប្រកាសអាសន្នទូទាំងទីក្រុង អភិបាលក្រុង Sevastopol លោក Mikhail Razvozhayev បានបញ្ជាក់​ថា៖ «ស្ថានភាពអាសន្ននេះនឹងនៅតែមានប្រសិទ្ធភាពរហូតដល់ស្ថានភាពប្រសើរឡើង​»។

ចំណែក​អភិបាលតំបន់​គ្រីមៀដែលត្រូវបានតែងតាំងដោយរុស្ស៊ី លោក Sergei Aksyonov បានបង្ហោះវីដេអូផ្ទាល់ខ្លួនរបស់លោក​ដែលប្រកាសស្ថាន​ភាព​អាសន្នទូទាំងតំបន់ ដោយសង្កត់ធ្ងន់លើហេតុផលសេដ្ឋកិច្ចដែល​នាំ​ឲ្យមាន​ចំណាត់ការ​នេះ។ លោក Aksyonov បាននិយាយថា «វិធីសាស្រ្តនេះគួរតែធ្វើឱ្យដំណើរការនៃការទាមទារសំណងខូចខាតទ្រព្យសម្បត្តិមានភាពងាយស្រួល​ និងរលូន»។

គួរបញ្ជាក់ថា តំបន់គ្រីមៀបានប្រឈមនឹងការដាច់ចរន្តអគ្គិសនីជាបន្តបន្ទាប់ ក្នុងរយៈពេល ១សប្តាហ៍កន្លងមកនេះ ខណៈដែលការវាយប្រហារពី​លើ​អាកាសរបស់អ៊ុយក្រែន បានកំណត់គោលដៅលើហេដ្ឋារចនាសម្ព័ន្ធថាមពល​។ អាជ្ញាធរបានស្នើសុំឱ្យប្រជាពលរដ្ឋកំណត់ការប្រើប្រាស់ថាមពលរបស់ពួកគេ ខណៈពេលដែលក្រុមជួសជុលមានគោលបំណងស្តារប្រតិបត្តិការធម្មតាឡើងវិញ សម្រាប់​បណ្តាញថាមពលក្នុងតំបន់៕