យោធាសហរដ្ឋអាមេរិកនិយាយថា ពួកគេបានវាយប្រហារអ៊ីរ៉ង់ម្តងទៀត រយៈពេលប៉ុន្មានម៉ោងប៉ុណ្ណោះ ក្រោយនាវាដឹកប្រេងមួយគ្រឿង រងការវាយប្រហារនៅច្រកសមុទ្រ Hormuz ដែលជាការកើនឡើងភាពតានតឹងដ៏អាក្រក់បំផុត ចាប់តាំងពីភាគីជម្លោះទាំង ២ បានចុះហត្ថលេខាលើកិច្ចព្រមព្រៀងសន្តិភាពបណ្តោះអាសន្នកាលពីរយៈពេល ២សប្តាហ៍មុន ។

ភាគីបង្កសង្រ្គាមទាំង ២ បានចោទប្រកាន់គ្នាទៅវិញទៅមកថា បានបំពានកិច្ចព្រមព្រៀងឈប់បាញ់ ដែលបានឈានដល់កាលពីរយៈពេល ២សប្តាហ៍មុន ដើម្បីបញ្ចប់ជម្លោះរយៈពេល ៤ខែ ។

ទីបញ្ជាការកណ្តាលសហរដ្ឋអាមេរិក និយាយកាលពីថ្ងៃសៅរ៍ថា កងកម្លាំងរបស់ខ្លួន បានបើកការវាយប្រហារជាថ្មី ក្រោយនាវាដឹកប្រេងដោតទង់ជាតិប៉ាណាម៉ា រងការវាយប្រហារដោយយានដ្រូនអ៊ីរ៉ង់ កាលពីព្រឹកថ្ងៃសៅរ៍ ។

ពួកគេបាននិយាយនៅក្នុងសេចក្តីថ្លែងការណ៍ថា អ៊ីរ៉ង់ត្រូវបានផ្តល់ឱកាសឲ្យគោរពកិច្ចព្រមព្រៀងឈប់បាញ់ ប៉ុន្តែបែរជាពួកគេមិនទទួលយកទៅវិញ ។

សេចក្តីថ្លែងការណ៍នេះបន្តថា ការវាយប្រហារទាំងនេះ គឺជាការឆ្លើយតបដោយផ្ទាល់ចំពោះការឈ្លានពាននៅតែបន្តរបស់អ៊ីរ៉ង់ លើការដឹកជញ្ជូនពាណិជ្ជកម្ម ដោយមានគោលដៅលើទីតាំងឃ្លាំមើល ទីតាំងទំនាក់ទំនង ទីតាំងការពារដែនអាកាស ទីតាំងស្តុកមីស៊ីល និងទីតាំងដាក់មីនរបស់អ៊ីរ៉ង់ ។

ខណៈពេលនោះដែរ ទូរទស្សន៍រដ្ឋអ៊ីរ៉ង់បានរាយការណ៍ថា ឆ្មាំបដិវត្តន៍របស់ខ្លួន បានធ្វើការឆ្លើយតបយ៉ាងម៉ឺងម៉ាត់ បន្ទាប់ពីកងកម្លាំងអាមេរិក បានវាយប្រហារប៉មទំនាក់ទំនងមួយ នៅក្នុងទីក្រុងកំពង់ផែ Sirik។

ដោយឡែក ទីភ្នាក់ងារសារព័ត៌មាន Mehr របស់អ៊ីរ៉ង់ បានរាយការណ៍ដែរថា កំពង់ផែ Sirikកំពុងដំណើរការធម្មតា ដោយគ្មានការខូចខាតណាមួយត្រូវបានរាយការណ៍ឡើយ សម្រាប់គ្រឿងបរិក្ខារ ឬឧបករណ៍ផ្សេងទៀត ៕