ស៊ីហ្គេម៖ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC និងជាអគ្គលេខាធិការគណៈកម្មាធិការជាតិអូឡាំពិកកម្ពុជាបានបង្ហាញអារម្មណ៍រីករាយ និងលែងមានក្ដីបារម្ភចំពោះពេលវេលានៃការជួសជុល និងកែលម្អហេដ្ឋារចនាសម្ព័ន្ធក្នុងពហុកីឡដ្ឋានជាតិអូឡាំពិក បន្ទាប់ពីទទួលបានភ្លើងខៀវពីសម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា។
ការលើកឡើងនេះបន្ទាប់ពីសម្ដេចតេជោ ហ៊ុន សែន បានណែនាំឲ្យក្រសួង និងស្ថាប័នពាក់ព័ន្ធធ្វើការពិភាក្សាគ្នាក្នុងការផ្ទេរអ្នកជំងឺកូវីដ-១៩ ដែលនៅសល់បន្ដិចបន្ដួចកំពុងសម្រាកព្យាបាលនៅពហុកីឡដ្ឋានជាតិអូឡាំពិក ទៅសម្រាកព្យាបាលនៅមន្ទីរពេទ្យហ្លួងម៉ែ ឬទៅចាក់អង្រែវិញ ដើម្បីប្រគល់ស្ដាតអូឡាំពិកឲ្យអាជ្ញាធរកីឡាធ្វើការជួសជុល និងកែលម្អសម្រាប់ត្រៀមធ្វើម្ចាស់ផ្ទះស៊ីហ្គេមឆ្នាំ២០២៣ ដែលនៅសល់ពេលតែ ១ឆ្នាំទៀតប៉ុណ្ណោះ។ តាមរយៈការទទួលបានអនុសាសន៍ដ៏ខ្ពង់ខ្ពស់របស់ប្រមុខរាជរដ្ឋាភិបាលនេះ ឯកឧត្តម វ៉ាត់ ចំរើន សម្ដែងការអរគុណយ៉ាងជ្រាលជ្រៅ ចំពោះការយកចិត្តទុកដាក់របស់សម្ដេចតេជោនាយករដ្ឋមន្ដ្រី ទៅលើហេដ្ឋារចនាសម្ព័ន្ធកីឡាសម្រាប់ត្រៀមព្រឹត្តិការណ៍ជាប្រវត្តិសាស្ដ្រនៅកម្ពុជានាឆ្នាំ២០២៣។ ឯកឧត្តមអះអាងថា ប្រសិនបើទទួលស្ដាតអូឡាំពិកឆាប់ៗមែន ក្រុមការងារជំនាញនឹងធ្វើការទាន់ពេលវេលាដោយគ្មានការព្រួយបារម្ភឡើយ ដូចជាការជួសជុលទីលានបាល់ទាត់ កន្លែងអង្គុយទស្សនា ទីលានប៉េតង់ សូហ្វតេន្នីស និងក្នុងវិមាននៃពហុកីឡដ្ឋានជាតិអូឡាំពិកជាដើម។
សូមបញ្ជាក់ថា សម្ដេចតេជោ ហ៊ុន សែន បានណែនាំឲ្យរដ្ឋមន្ដ្រីក្រសួងពាក់ព័ន្ធសិក្សាពីការផ្ទេរអ្នកជំងឺកូវីដ-១៩ ចេញពីពហុកីឡដ្ឋានជាតិអូឡាំពិក ដើម្បីប្រគល់ស្ដាតឲ្យគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) នៅក្នុងជំនួបសំណេះសំណាលជាមួយប្រតិភូ និងអត្តពលិកចំនួន ៥៦០នាក់នៅសាលមហោស្រពកោះពេជ្រកាលពីថ្ងៃទី២៨ ខែមេសាម្សិលមិញ មុនប្រតិភូកីឡាកម្ពុជាចេញទៅប្រកួតកីឡាស៊ីហ្គេម នៅប្រទេសវៀតណាមចាប់ពីថ្ងៃទី១២-២៣ ខែឧសភា ឆ្នាំ២០២២ ខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
