ព្រឹត្តិការណ៍បាល់ទះ តេជោលីគ រដូវកាលទី៣ បានរកឃើញបេក្ខភាពវគ្គពាក់កណ្ដាលផ្ដាច់ព្រ័ត្រជាផ្លូវការ ក្រោយបញ្ចប់ការប្រកួតសន្សំពិន្ទុជុំទី២ ជាស្ថាពរ ក្នុងចំណោមក្រុមខ្លាំងទាំង ៦ ដោយក្រុមវិសាខា ឈរលេខ១ បញ្ជាការដ្ឋានអង្គរក្ស ឈរលេខ២ ស្នងការនគរបាលខេត្តស្វាយរៀង ឈរលេខ៣ និងស្នងការនគរបាលរាជធានីភ្នំពេញ ឈរលេខ៤ គ្រាដែលក្រសួងមហាផ្ទៃ និងស្នងការនគរបាលខេត្តកោះកុង បានធ្លាក់ត្រឹមជុំទី២។

ទន្ទឹមជាមួយជាមួយការរកឃើញបេក្ខភាព ៤ក្រុមចុងក្រោយនេះ បានធ្វើឲ្យលទ្ធផល ដែលអ្នកគាំទ្រមួយចំនួន ចង់ឃើញក្រុមវិសាខា និងបញ្ជាការដ្ឋានអង្គរក្ស ជួបគ្នាម្ដងទៀត នៅវគ្គផ្ដាច់ព្រ័ត្រ អាចមានភាគរយខ្ពស់ ដោយផ្អែកលើលក្ខខណ្ឌ និងទម្រង់លេងបច្ចុប្បន្នរបស់ក្រុមខ្លាំងទាំងពីរ ពិសេសលទ្ធផល នៃការធ្លាប់ជួបគូប្រជែងក្នុងវគ្គ ១/២ ផ្ដាច់ព្រ័ត្រកន្លងមក។

យោងតាមរូបមន្ដប្រកួតវគ្គខ្វែង ៤ក្រុមចុងក្រោយ ក្រុមលេខ១ ត្រូវជួបក្រុមលេខ៤ និងក្រុមលេខ២ ត្រូវជួបក្រុមលេខ៣ នៃជុំទី២ មានន័យថា ក្រុមវិសាខា ត្រូវជួបស្នងការនគរបាលរាជធានីភ្នំពេញ និងបញ្ជាការដ្ឋានអង្គរក្ស ត្រូវជួបក្រុមស្នងការនគរបាលខេត្តស្វាយរៀង។ នេះគឺជាឱកាសមួយ សម្រាប់ក្រុមឈ្នះ ដែលត្រូវឡើងទៅជួបគ្នានៅវគ្គផ្ដាច់ព្រ័ត្រ ពិសេសវិសាខា និងបញ្ជាការដ្ឋានអង្គរក្សតែម្ដង។

ជាការពិតដើម្បីបានឡើងទៅជួបគ្នានៅវគ្គផ្ដាច់ព្រ័ត្រ ក្នុងចំណោមបេក្ខភាពក្រុមខ្លាំងទាំង ៤ សុទ្ធតែត្រូវការឈ្នះ ដើម្បីប្រជែងឱកាសមាសនេះ តែក្រឡេកទៅមើលប្រវត្តិជួបគ្នាកន្លងមក វិសាខា បានយកឈ្នះក្រុមស្នងការនគរបាលរាជធានីភ្នំពេញ ទាំង ២ជុំ ក្នុងលទ្ធផល ៣-០សិតនៅជុំទី១ និង ៣-១សិតនៅជុំទី២ គ្រាដែលបញ្ជាការដ្ឋានអង្គរក្ស ដូចគ្នា គឺបានយកឈ្នះក្រុមស្នងការនគរបាលខេត្តស្វាយរៀង ទាំង ២ជុំ ក្នុងលទ្ធផល ៣-១សិតនៅជុំទី១ និង ៣-០សិតនៅជុំទី២។

លទ្ធផលដែលពិបាកប្រកែកនេះ ច្បាស់ណាស់អ្នកគាំទ្របានមើលឃើញពីឱកាសខ្ពស់ ដែលវិសាខា និងបញ្ជាការដ្ឋានអង្គរក្ស មានសង្ឃឹមអាចឡើងជួបគ្នានៅវគ្គផ្ដាច់ព្រ័ត្រ ក្រោយគេចផុតពីជំនួបក្នុងវគ្គពាក់កណ្ដាលផ្ដាច់ព្រ័ត្រ។

អ្នកស្នេហាវិស័យកីឡាបាល់ទះកម្ពុជាមួយចំនួន បានបង្ហាញក្ដីរំពឹងចង់ឃើញជំនួបដ៏កក្រើកជាថ្មី រវាងក្រុមវិសាខា និងបញ្ជាការដ្ឋានអង្គរក្ស ក៏ព្រោះមិនអស់ចិត្តនឹងលទ្ធផល ដែលវិសាខា បានយកឈ្នះក្រុមជើងឯក ២សម័យដាច់ ៣-០សិត នៅក្នុងជំនួបជុំទី២ កាលពីថ្មីៗ។

បែបនេះក្ដី នេះគ្រាន់តែជាការសន្និដ្ឋាន ខណៈអ្វីៗត្រូវរង់ចាំអ៊ុតលទ្ធផលការប្រកួតវគ្គ ១/២ ផ្ដាច់ព្រ័ត្រនាថ្ងៃទី១ ខែកក្កដាខាងមុខ តើក្រុមណាខ្លះ នឹងទទួលបានឱកាសបន្ដដំណើរឡើងទៅប្រជែងជើងឯកតេជោលីគ រដូវកាលទី៣ ឆ្នាំ២០២៦? សម្រាប់វគ្គផ្ដាច់ព្រ័ត្រគ្រោងនឹងធ្វើឡើងនាថ្ងៃទី៣ ខែកក្កដាខាងមុខ នៅវិមានពហុកីឡដ្ឋានជាតិ(អូឡាំពិក)៕ អត្ថបទ លី ឈុនឡា